Lafaek News–Portavoz Movimentu apoiu Kay Rala Xanana Gusmão, Amaro Susar, hateten Dom Boaventura fo tiha ona bensaun ba Ramos Horta liu husi povu Manufahi iha loron 19 fulan Marsu sei fo votus maioria absoluta ba José Ramos Horta ba Prezidente Repúblika no 2023 kontiua fo votus ba Xanana Gusmão ba Primeiru Miinstru iha eleisaun parlamentar.
Ita lakohi povu sakrifika an bebeik, ita lakohi ema sama konstituisaun, nasaun ne’e nia destinu iha Xanana ho Horta nia liman, lalika hakfodak Boaventura fo ona bensaun ba sira nain rua kontinua lidera povu ho nasaun ne’e ba oin,’’ dehan Amaro Susar iha nia intervensaun polítika iha kampania daneen iha Manufahi, segunda (07/03/22).
Amaro Susar afirma, husu veteranus hotu iha Manufahi atu muda pozisaun, labele kumu liman beibeik, tempu ona loke liman hodi hametin paz, estabilidade kontribui ba prosesu dezenvolvimentu nasionál hodi liberta povu husi kiak no mukit.
Iha fatin hanesan koordenador partidu CNRT munisípiu Manufahi Patriocino Fernandes, husu militantes sira husi partidu FRETILIN, ASDT, PLP, PD ho KHUNTO husi Manufahi oan labele dukur lolo liman hamutuk laran ida neon ida apoiu kandidatu númeru sorteiru 14 José Ramos Horta atu bele simu todan Prezidente Repúblika iha 2022-2027 hodi hasai povu husi aitarak okos, komesa kedan husi 2017 too ohin loron.
Mai ita hamutuk fo apou tomak ba José Ramos Horta hodi simu kna’ar xefe estadu hodi hakotu tiha impasse politika hatuur halo repozisaun orden konstitusional hatur hikas iha fatin, evita krize no hasai tiha ita nia povu husi Aitarak okos no valoriza ema sira ne’eb mate tanba rai ne’e hodi sosa independénsia ida ne’e,’’ afirma Fernandes.
Patriocino argumenta, militantes CNRT iha munisípiu Manufahi prontu fo votus hotu ba José Ramos Horta ne’ebé tua liman husi Prezidente CNRT Kay Rala Xanana Gusmão rasik, husu Manifahi oan lalika hili kandidatu seluk, militantes partidu hotu iha Manufahi buka malu ko’alia ba malu tempu ona buka ema matenek hodi hadia rai ne’e valoriza ba asuwain sira nia luta ba independensia rai ne’e.
Entretantu, kandidatu prezidente Repúblika periodu 2022-2027, númeru sorteiru 14, premiadu Nobel da Paa, José Ramos Horta, hatoo agradesimentu boot ba povu Manufahi oan tomak ne’ebé lakon sira nia tempu hodi simu kandidatu ho Xanana Gusmão iha kampania ba daneen ne’e iha Manufahi Villa, hatoo mos agradese boot ba mvoimentu oi-oin ho partidu polítikus sira ne’ebe muda sira nia pozisaun polítika hodi apoiu kandidatu númeru sorteiru 14 simu responsabilidade iha loron 19 fulan Marsu 2022 ba xefe estadu.
”Manufahi rai istóriku, istoria tama iha portugal, tanba iha Portgual nia tempu mak Dom Boaventura luta ba libertasaun, 1974, ha’u rasik akompania ita nia primeiru lider Avo Xavier akompnia Nicolau Lobat, Luis Guterres no Rui Guterres ami joven lubun ida mak hahú ASDT mai iha Same hasoru Dom Boaventura nia faluk iha ha’u nia eskritoriu (office) iha Dili iha galeria ida, foto boot ida maka Dom Boaventura ho nia faluk, omenajen hakruuk ba Dom Boaventura,” katak José Ramos Horta iha nia diskursu polítika ikus iha kampania ba daneen iha munisipiu Manufahi segunda ne’e.
Horta mos hatoo agradesimentu boot tebes ba Kay Rala Xanana Gusmão, tanba bele destaka konfiansa ba nia hodi kandidata an ba prezidente repúblika iha periodu 2022-2027, hakuak boot ba militantes tomak husi partidu oi-oin no movimentus oi-oin inklui arte marsial ho arte ritual ne’ebé lolo liman hamutuk ho Xanana Gusmão apoiu kandidatu númeru 14 iha loron 19 fulan Marsu 2022.
Observasaun lafaek news, nota iha kampania kandidatu ELPR númeru 14 la’o ho hakmatek, militantes sira sivilazdu hodi rona intervensaun polítika husi movimentu oi-oin ne’ebe apoiu kandidatura ne’e, iha okaziaun ne’e militantes husi partidu KHUNTO ho FRETILIN halo deklarasaun ofisial apoiu kandidatu nú-14, durante oras rua atividade polítika ne’e la’o di’ak apoio seguransa husi PNTL Manufahi, hetan obserador husi PDHJ ho CNE, tuir ajenda kandidatu númeru 14 sei kontinua kampañia ba dahitu nian iha loron tersa (08/03/22) iha munisípiu Suai.
Jornalista : Abekha Raihusar
Editor : Agapito de Deus
