Lafaek News—Komandante Polísia Postu Administrativu Zumalai, Munisípiu Kovalima Inspetór António Soares, husu ba komunidade tomak mantein pás durante selebrasaun tinan foun no kumpre regra estadu emerjénsia ne’ebé governu deside liuhosi enkontru ezekutivu (KM).
“Ha’u garantia situasaun iha festa tinan foun sei la’o normal, sei la mosu problema, sé ida ne’e mak komunidade sira hamosu problema ita sei prosesu tuir lei,” Inspetór António informa ba Lafaek News iha nia knaar fatin, kinta (31/12).
Nia afirma, daudaun ne’e polísia hala’o nafatin patrullamentu hodi asegura situasaun bele la’o hakmatek hodi la fó tempu ba kriminozu sira halo asaun kontra regra.
“Ba tinan foun ami mantein ho orário ne’ebé planea ona bazeia ba komandu jerál nia orientasaun,” informa nia
Argumenta nia, durante ne’e situasaun en jerál iha postu administrativu Zumalai la’o ho hakmatek tanba iha kooperasaun di’ak entre forsa seguransa no defeza (PNTL-F-FDTL) liuhosi operasaun konjunta hamutuk.
Ikus komandante ne’e apela hodi husu ba komunidade liuliu juventude sira hotu ne’ebé kompostu hosi suku 8 iha postu administrativu Zumalai atu nafatin mantein pás no kumpre desizaun ne’ebé foin lalais governu deside kona-ba regra EE hodi prevene propagasaun surtu covid-19.
Jornalista: Orlando Magno
Editór : Ezequias Tomás
