Lautém-(Lafaek News)—Populasaun uma kain 63 suku Baduru, postu administrativu Lautém, munisípiu Lautém, aldeia 5 kompostu husi Malailada, Irpala, Lua-Dau, Tamaro no Lakulmonu durante tinan tolu krize bee moos.
“Bee moos ne’e durante Tinan tolu ona bee laiha forsa hodi Tama iha ami nia Bairru, tan ne’e komunidade dala barak ba hamoos bee matan maibé nafarin Forsa laiha hodi fornese ba konsumidores sira,” Faustino afirma ba jornalista lafaek news iha Lautem, (30/12/2020).
Autoridade lokál ne’e esklarese, Bee moos ne’ebé maka agora da-daun komunidade sira uza ne’e fasilita husi ONG Plan internasional no Australian Aid, maibé fou-foun bee sai no forsa liu, maibé liu tiha tinan Ida bee laiha forsa oona atu distribui ba uma kain sira seluk.
Tan ne’e, komunidade dala barak uza karosa ho motor hodi kuru bee moos tanki ne’ebé ho distánsia dook hodi utiliza ba nesesidade loro-loron.
Sorin seluk, komunidade Alarico Fernandes, haktuir bainhira iha tempu bai loron bee menus, nune’e komunidade sira tenke kontrolu la’o tuir kanu ne’ebé dada bee hodi hadia hafoin bee bele sulin too iha uma hodi komunidade sira kuru.
“Dala barak Ami organiza malu ba hamo’os be matan iha mahina1,, maibé bee mak nia Forsa la to’o iha Ami nia komunidade sira hodi konsume ba moris lor-loron nian, tanba ne’e Hau tenta konfirma fali ONG Plan internasional no Australian Aid atu mai hadia fali bee sira ne’e,” hatutan nia
Ikus liu, iha entrevista lafaek news ho komunidade suku refere rekomenda ba governu atu buka solusaun liu husi Orsamentu Jerál Estadu 2020 nian nune’e populasaun suku Baduru tomak bele asesu ba nesesidade loro-loron.
Jornalista : Aniceto Dias
Editora : Nelya Barros
