Lafaek News—Sekretariu Estadu Protesaun Sivil (SEPS), hahú husi loron 1-13 rejistu vítima dezastre hamutuk 94 ne’ebé afeta husi udan, anin no rai halai, inklui ahi han uma.
Diretor Nasionál Jestaun Risku Dezastre Agustinho Cosme Belo informa, iha semana ida liu ba akontesimentu udan boot mosu dezastre oi-oin hanesan bee sa’e, mota lori ema, anin sobu uma, ai hanehan uma, ahi han no erozaun.
“Dadus provizóriu husi tipu dezastre hirak ne’e uma kain ne’ebé afetadu ba dezastre hamutuk 94 liu liu iha munisípiu Dili uma kain 64, Vikeke 3, Kovalima 6, Aileu 1, Manatutu 1, Bobonaru 7 Manufahi 2 no mos Raeoa uma kain 2,” dehan Agustino ba jornaliata liu huai komferensia imprensa iha salaun SEPS Kaikoli Dili, Sesta 15/01/2021.
Agostino afirma, uma kain 94 ne’e SEPS ho nia parseiru halo ona apoiu emerjensia hanesan Ai-han no mos la’os Ai-han ba vítima 76.
Nune’e mos sei iha balun seidauk hetan apoiu emerjénsia, tanba stock iha munisípiu mak laiha ona, maibé da-daun ne’e SEPS sei esforsu hela atu diatribui sasán apoiu emerjénsia ba stock sira iha munisípiu.
Diretór ne’e afirma bainhira tempu udan númeru vítima dezastre sempre sae entaun liu husi biban ida ne’e SEPS alerta ba populasaun tomak iha Timor-Leste liu liu ba populasaun ne’ebe hela iha fatin risku hanesan mota ninin, foho lolon no seluktán tenke kuidadu.
“Populasaun sira nafatin kuidadu aan bainhira akontese udan boot, rai halai tanba asuntu ba redusaun dezastre laos iha SEPS nia liman maibé iha ita hotu nia liman,” nia esplika.
Jornaliata : Orlando Magno
Editora : Nelya Barros
