Lafaek News—Sekretariu Estadu Protesaun Sivíl (SEPS), Joaquim José Gusmão dos Reis Martins, papél protesaun sivíl prontu solusiona problema dezastre naturais ne’ebé akontesimentu kualkér momentu.
“Papél protesaun sivíl nian mak halo prevensaun, maibé dezastre akontese ona ita la’o tuir lei neebe iha hodi responde emerjensia fo food item,” dehan SEPS Joaquim liu husi nia diskursu iha Salaun SEPS Kaikoli Dili, Kinta semana ne’e.
Joaquim relata, SEPS hasoru problema mudasna klimátika hanesan iha loron 08 fulan Dezembru mosu inundasaun iha Suai, Malibaka Maliana no Beco, aldeia rua hetan afetadu no iha fatin balun akontese anin bo’ot ai-monu anin sobu uma.
“Ba akontesimentu nee Atu fo asisténsi ne’ebé lais presiza fasilidade iha ita boot sira nia fatin armazen munisípiu, tanba ne’e ita antisipa komesa agora mobiliza kedas sasán iha ne’eba,” dehan Joaquim.
Núne’e mos nia fó hanoin ba komunidade ne’ebé hela iha fatin risku dezastre nian hanesan iha mota ninin, foho lolon no seluk tan tenke kuidadu aan ho risku husi udan no anin boot.
“Ita tenke fo hanoin nafatin ba sira katak ita boot sira nia hela fatin ne’e risku tebes ba dezastre Kuandu udan no anin bo’ot inklui rai halai tenke kuidadu aan tanba Ita nia papel mak hanesan bainhira dezastre akontese oinsa mak bele minimiza vítima sira,” nia esplika.
Entretantu, Joaquim lori VIII governu nia naran hatoo agradesimentu ba parseiru sira nia prezensa, hanesan Sentru Lojistik Nasionál (CLN), apoiu foos hamutuk 10 mil toneladas, kompañia lider Unid.Lda apoiu Familia kits saku rihun neen, foos saku rihun neen kompañia Jacinto unid.Lda apoiu nesesidade báziku hanesan superme kaixa rihun tolu, sardina kaixa 1350, susu ben kaixa 220 no sasán báziku selauk tan.
Jornalista : Orlando Magno
Editora : Nelya Barros
