Lafaek News—Husi loron 11 to’o 17 Novembru 2020, Polísia Nasionál Timor-Leste (PNTL), rejista kazu asidente ho insidente hamutuk 55 iha munisípiu 12 inklui RAEOA.
“Durante semana ida Komandu Jerál PNTL rejistu kazu asidente hamutuk 12, kompostu husi, motor ho motor soke malu 5, kareta ho motor soke malu hamutuk 4 no seluk tan neebe rezulta ema kanek maibe ema mate la iha,” dehan Porta Voz KOMJER PNTL Arnaldo liu husi komferensia Imprensa iha Komandu Jerál Kaikoli Dili, tersa 17/11/2020.
Porta voz Komandu Jeral PNTL Superintendente Xefe Arnaldo de Araujo informa, kazu kompostu husi asidente 12 no insidente 43 ne’ebe akontese iha munisipiu 12 inklui Raeoa hamutuk 55. .
“Insidente sira ne’e dominante liu mak violénsia doméstika 10, asaltu malu 8, tuda malu 7, kazu hirak ne’e mak aas liu iha semana ida ne’e sira seluk kazu bai-bain,” Arnaldo relata.
Porta Voz ne’e informa, PNTL iha rai laran hala’o hela seguransa no mós halo pasa revista ba motorizada no karreta inklui mós sasán tanba la kleur tan Timor-Leste tama ona komemorasaun loron independensia 28 Novembru.
“Polísia sira fó seguransa makaas tebes ba fatin hotu-hotu tanba ne’e husu ba komunidade sira bainhira la’o karik labele haluha lori dokumentu motorizada no kareta nian inklui mós karta kondusaun nune’e labele impaktu bainhira sira la’o iha dalan tanba da-daun ne’e PNTL munisipiu hotu halo hela pasa revista,” Arnaldo hakotu.
Jornalista : Orlando Magno
Editora : Nelya Barros
