Covalima (Lafaek News)-Natureza ne’ebé mak liuhosi rai halai no akompaña ho udan bei-beik fó ameasa ba postu Saúde Nanu ne’ebé durante komunidade kuaze rihun ida resin mak halo tratamentu iha suku Nanu, postu administrativu Fatumea, munisípiu Covalima.
Tuir Xefe Suku Nanu, Anseltino da Cruz, konsideira rai halai hodi fó impaktu ba edifísiu postu Saúde Nanu, atu Monu ne’e, tanba Natureza ne’eb liga ba kondisaun klima ne’ebé hamosu udan bei-beik, la’ós tanba failansu husi kompaña ne’ebé halo konstrusaun.
“Uma atu monu ne’e, tanba udan bei-beik halo rai halai, ida ne’e mós mai hosi natureza, ita hotu la espera akontese hanesan ne’e,” informa Xefe Suku Nanu, Anseltino da Cruz ba Lafaek News liuhosi via telefone, Domingu (17/01/2021) iha Munisípiu Covalima.
Nune’e, Xefe Suku Nanu ne’e, konta kronolójia kona-ba rai monu iha Postu Saúde Nanu ne’ebé fó ameasa ba edifísiu, akontese rai monu ne’e depois kompañia ne’ebé kaer projeitu ne’e atu entrega ona ba Ministériu Saúde, maibé momentu ne’eba akontese rai monu sei dook husi edifíisiu kuaze Metru 5.
Akontese rai halai iha areadór Postu Saúde Nanu, entaun Kompañia ne’ebé kaer Obra mos esforsu hodi halo prevensaun ba rai halai ne’e, maibé labele tanba grave liu ona.
“Kompañia ne’e ateru bei-beik, kuaze dala rua ka tolu ona, maibé iha rai okos ne’e iha ne’ebé mak bee suli hela, tan ne’e mak ha’u haruka sira para tiha, para hodi haree tok maneira seluk hanesan kuda ai-oan para hodi salva obra ida ne’e,” Nia esplika.
Nia hatutan, Durante ne’e nia halo ona esforsu liuhusi dalan kultura ninian atu esponde ba situasaun ne’e, maibé kondisaun uma postu Saúde Nanu aumenta Grave ho ameasadu hosi Natureza.
Ho preokupasaun ne’e, Xefe Suku Nanu Anseltino da Cruz, hato’o ona ba autoridade kompotente iha Munisípiu atu bele responde lalais, nune’e postu saúde labele monu, maibé seidauk iha responde positivu.
“Ha’u relata ona ba Munisípiu, ha’u husu atu halo prevensaun ba obra ida ne’e, mak ita tenke halo Barazeng (Boronjong) para rai ne’e labele monu tan,” Tenik Xefe Suku Nanu.
Tuir informasaun ne’ebé Lafaek News hetan husi Autoridade Suku Nanu katak, Postu Saúde Nanu hetan ameasadu husi Rai Monu ne’e, hahú kedas iha tinan 2019 liu ba, nomós relaisona ho loron feriado (domingo) mak to’o notisia ne’e hatun, Lafaek News seidauk bele halo konfirmasaun ho Autridade kompotente iha Munisípiu Covalima.
Jornalisa : Chamot Nahac (RCCT)
Editór : Floriano Soares
