Lautém (Lafaek News)-Ho produsaun ne’ebé mak komunidade sira kuda hanesan Batar iha suku Baduro, postu administrativu Lautém, Munisípiu Lautém hetan estragus hotu kedas hosi ular-oan.
“Ami nia batar sira ne’ebé mak kuda iha toos laran ne’e, kuaze ular mak haan hotu, tanba ne’e ami husu ba Ministériu Agrkultura no Peska atu toma medida ba prevensaun, ami nia hanesan agrikultór, ami nia hahan depende ba batar sira ne’ebé mak mai kuda,” dehan Agrikultór Teoderico Pereira ba Lafaek News, Domingu (17/01/2021) iha suku Baduro, Munisípiu Lautém.
Nia haktuir, ular komesa estragus hahú husi fulan Dezembru nia laran ate agora seidauk iha ekipa hosi Ministeriu Agrikultura no Peska (MAP) halo medida prevendasaun.
Iha sorin seluk, komunidade Juliana da Costa, husu ba parte kompetente atu bele tulun aimoruk hodi rega ular sira ne’ebé durante ne’e estraga komunidade nia batar.
“Hau husu ba parte ne’ebé toma konta ba agrikultura nian hodi lori aimoruk atu hamate ular sira ne’e, tanba estraga hotu ona ami nia batar sira,” dehan Juliana.
Nia afirma, akipa MAP la toma medida lalais mak komunidade sei infrenta hamlaha iha tinan oin, tanba komunidade nia batar kuaze estragus total ona.
“MAP la hatan lalais ida ne’e mak tinan oin ami sei hamlaha, tanba ami nia batar sira ne’ebé ami kuda hetan estragus hotu, ne’e la’ós ha’u mesak de’it, maibé suku ida ne’e nia laran tomak hotu-hotu hanesan hotu,” hakotu nian.
Jornalista : Anselmo Monteiro
Editór : Floriano Soares
