Lafaek News (Bobonaro)—Governu konstituisionál da-ualu iha semana kotu deside lockdown total ba movimentu populasaun husi munisípiu Bobonaro ho Kovalima tanba besik liu fronteira, maibé difikulta vida agrikultór atu lori produtu lokal asesu ba merkadu.
Preokupasaun hirak ne’e hato’o husi Agrikultór Romualdo Leto Mau, relasiona ho situasaun Lockdown ne’e difikulta tebes agrikultór iha munisípiu Bobonaro liu-liu iha suku Soilesu, postu administrativu Bobonaro, munisípiu Bobonaro atu enkamina sira nia produtu ba merkadu liu-liu atu asesu ba merkadu nasionál.
“Situasaun globál ida ne’e difikulta tebes ami agrikultór sira iha munisípiu Bobonaro atu enkamina ami nia produtu ba merkadu, tanba durante ne’e, antes lockdown ami toos nain sempre lori ami nia produtu ba to’o Dili, nune’e bele hetan netik rendimentu ruma hodi sustenta ami nia moris,” katak agrikultór Romualdo Leto Mau ba lafaek News Liu husi via facebook, Segunda (22/02/21).
Nia hatutan, produtu ne’ebé koilleta semanalmente máka ai-manas, maibé kona-ba liis mean durante udan ne’e menus, nune’e liis mean la presiza urjente lori ba merkadu, maibé aimanas ne’e sensitivu liu, tanba kada semana mak la ku’u entaun dodok hotu iha toos laran, satan agora produtu aimanas folin di’ak iha merkadu.
“Ami aseita governu dekreta lockdown tanba bele limita transmisaun lokál Covid 19, atu labele daet maka’as, maibé governu presiza mós estabelese mekanizmu oinsa mak bele enkamina ami nia produtu asesu to’o merkadu, nune’e ami mós la sente deskriminadu, tanba ami akompaña iha sorin seluk governu dekreta lockdown total,” Nia dehan.
Maske, governu deside taka movimentasaun populasaun nian, maibé iha munisípiu Bobonaro, programa governu hala’o distribuisaun Cesta Bázika kontinua la’o no lakumpre protokulu saúde nian.
“Munisípiu Bobonaro nia laran distribuisaun Cesta bázika la’o nafatin sem iha protoklu saúde ruma, sekarik iha transmisaun lokál duni ne’e situasaun ne’e fó risku bo’ot ba ami ne’ebé hela besik fronteira, neduni ami husu governu tenke tau atensaun sériu,” hakotu Nia.
Jornalista : Juvita dos Santos
Asisten Editór : Pedro de Almeida
