Lafaek News—Tékniku Sosiál Postu-administrativu Kristu-Rei, munisípiu Dili, Ruben de Sousa Mendonça, afirma, komunidade barak husu atu rejistu foun ba programa bolsa da mãe, maibé nia parte sei hein orientasaun governu, tanba númeru populasaun barak kompara ho postu seluk.
“Normalmente ita iha postu-administrativu Kristu Rei bolsa da mãe ne’e bo’ot liu kompara ho postu sira seluk,” dehan Ruben de Sousa Mendonca, Tékniku Sosiál Postu-administrativu Kristu-Rei, ba Lafaek News iha Sentru Solidariedade Sosial Munisípiu Dili, segunda, (22/02/2021).
Tékniku sosiál ne’e esplika, bazeia ba servisu sosiál ne’ebé durante ne’e halo atendimentu iha ba komunidade barak seidauk benefisia ba programa bolsa da mãe.
“Durante komunidade sira sempre mai husu atu rejistu, maibé tinan ida ne’e diresaun nasionál programa bolsa da mãe iha ona planu atu halo rejistu foun, maibé seidauk hatene kona-ba data fiksu, se iha ona orientasaun husi ministériu sei koordenasaun ho autoridade lokal sira atu bele aviza ba komunidade atu bele mai rejistu,” nia informa.
Enkuantu iha servisu atendimentu sosiál atravez tékniku sosiál postu-administrativu Kristo-Rei halo ona atendimentu ba familia vulneravel hamutuk 80.
Tuir nia katak, Familia hirak ne’e balu aprezenta husi autoridade lokal no balun mai aprezenta sira nia preukupasaun iha fatin atendimentu sosiál postu administrativu ne’ebé mai ho problema sosial la hanesan, menus aihan, uma laiha kondisoens atu hela inklui orsamentu la sufisiente atu sustenta familia nia nesesidades bazikas.
Iha dadus prosesu pagamentu ba benifisiarius bolsa da Mãe iha Kristu-Rei hamutuk 1757 iha tinan 2020 ne’e konklui ona tuir programa bolsa da mãe estabelese ho objetivu atu hamenus kiak promove edukasaun no hadiak saúde hodi fó benefísiu ba feto no labarik vulneravel iha Timor Leste, ne’ebé haktuir ba dekretu lei nu.18/2012, 4 de Abril no Diploma Ministerial nu. 27/2012, 19 Setembru.
Jornalista : Pedro de Almeida
Editora : Nelya Barros
