Lafaek News— Prezidénsia Repúblika liu husi Gabinete Sosiedade Sivíl no Apoiu Sosiál (SSAS) oferese kadeira roda bá portadór difisiénsia, Elizabeth Soares iha iha suku Beloi munisípiu Ataúru.

Iha serimonia entrega kadeira roda ne’e, Amélia Soares, nu’udar inan husi difisiensia Elisabeth Soares de Oliveira, agradese ba tulun ne’ebé fo husi Prezidénsia Repúblika.
“Nu’udár inan, ha’u sente haksolok tebes no obrigadu tambá Prezidente Repúblika Horta bele oferese kadeira roda mai ha’u nia oan feto Elizabet Soares de Oliveira ne’ebé oras ne’e tinan 30 ona. Antes ne’e, ami sempre aprezenta ba entidade balun kona-ba konsidasaun moris ne’e, liu-liu kadeira roda ne’ebé at, maibé la iha ida mak tau matan, ami nia orasaun nafatin ho ita (Prezidente Repúblika)” Hateten Amélia komunikadu ne’ebé jornalista asesu iha média Palásiu prezidensiál nian, Kuarta, ( 14/06/2023).

Amélia haktuir , oras ne’e dadaun sira hela iha Aldeia Usu-Bemasu, Suku Beloi no laiha tebes kbi’It atu sosa kadeira roda, tulu Elisabeth Soares asesu ba servisu saúde.
Enkuantu, Ekipa Gabinete Sosiedade Sivíl no Apoiu Sosiál (SSAS) husi Prezidénsia Repúblika mos apoia nesesidade bázika no material disportiva ba iha Aldeia Iliana Suku Bikeli no Beloi.
Reprezentante benefisiáriu husi suku Bikeli no Beloi, nu’udár no Xefe Juventude, Pastór Andre Soares mos agradese ba Prezidénsia Republika ne’ebé mak tulun ona komunidade suku Bikeli.
“Reprezenta povu no juventude, ha’u fó obrigadu ba Prezidente Repúblika, hadomi tebes povu doben, ami nia apoiu orasaun nafatin Nia to’o nia ukun remata. Ami agradese tanba bele apoiu ami. Husu mos atu hare infrastutura bázika hanesan be moos ba komunidade,’’ tenik Pastór Andre Soares.
Enkuantu, Komunidade sira mós husu atu kontinua apoiu atividade juventude Atauro hodi kontribui ba dezenvolvimentu nasional.
Jornalista : Rita Moniz
Editór : Agapito de Deus