Lafaek News—Prezidente Konsellu Imprensa eleitu António Maria da Conceição Moniz Mali, promote ho mandatu foun perante tinan 4 sei tane as lala’ok media nian responsabilidade, integridade no Liberdade imprensa iha Timor Leste buras ba nafatin.
António Mali mos hatoo agradesimentu ba konfiansa tomak ne’ebé depozita hosi jornalista sira ne’ebé halibur iha Assosiasaun Jornalista Timor Leste (AJTL), Timor Leste Press Union (TLPU) no Uniaun Profisaun Jornalista (UPJT) no nia mos apresia jornalista hotu ne’ebé kontribui maka’as hodi garante nafatin Liberdade imprensa iha Timor Leste hanesan nasaun seluk iha mundu.
“Agradese ba kolega Jornalista sira liu-liu asosiasaun ne’ebe mobiliza ona sira nia membru sira vota mai ha’u, ne’e todan ida hanesan bain bain reponsabiliza ida ne’ebe hau tenki tula iha ha’u kba’as, durante tinan 4, ida ne’e la’os papel de’it, maibé hanesan komprimísiu ida hamutuk ho kolega konsellu sira seluk ami tane as lala’ok media nian atu responsablidade, integridade no haburas liberdade imprensa,” António Mali hatoo iha nia diskursu ba jornalista sira hafoin eleitu ho votus 3, hodi assume kargu hanesan Prezidente Konsellu Imprensa peridu tinan 4.
Nia dehan, ho kna’ar foun ida ne’e, nia parte sei servisu hamutuk ho konselleru nain 4 esforsu hamutuk hodi luta nafatin ba Liberdade imprensa no Liberdade espresaun buras iha rai ida ne’e.
“Hamutuk ho ha’u nia kolega Konsellu sira ami hamutuk sei halo esforsu másimu ba liberdade imprensa iha ita nia rai ne’e atinje dun ho objetivu ne’ebe ita hotu hakarak, tanba publiko atu hatene informasaun ne’ebe loos kredivel no tane as normas sira iha kona-ba jornalismu nian,” nia fundamenta.
Nune’e, Prezidente Sesante KI, Otélio Oté, espresa prosesu ida ne’e hala’o tuir lei númeru 23 estatutu Konsellu Imprensa, prosesu hirak ne’e la’o ho demokrátiku, finalmente konfiansa monu iha Antonio Mali hodi kontinua mandate foun ba tinan 4.
“KI organiza eleisaun ba Prezidente Konsellu lmprensa ba 2025 to 2029 prosesu ida hala’o tuir mandatu da lei no mandato estatutu Konsellu lmprensa artigu 23, ami halo prosesu ida ne’e demokrátiku tebes tebes ikus mai ami rezulta ona Presidente Konsellu foun, Sr. Antonio Maria da Conceição Monis Mali, hafoin prosesu ida ne’e ami sei hato’o karta offisial ida ba Parlamentu Nasiona, ikus sei iha ajenda kona-ba Parlamentu Nasional, kona-ba tempu tomada de pose Prezidente eleitu ho nia membro sira nain 4, hamutuk nain sira 5, Konsellu lmprensa atual remata ona nia mandatu ba 2021 to 2025, Ote sublina.
Prosesu eleisaun rezulta ronde daruak, ho rezultadu kandidatu Antonio Maria da Conceição Monis Mali hetan votus 3, kandidatu Isabel Maria Fernandes hela ho votus 2, nune’e estrutura Konsellu Imprensa foun ba periodu 2025-2029, membru mak Antonio Maria da Conceição Monis Mali, Joaquim de Fátima Coutinho mak representante Jornalista, representante komunikasaun sosial Suzana Cardozo, ba mandatu daruak husi Parlamentu Nasional, Benevides Correia Barros ho Isabel Fernandes.
Jornalista : Maria José
