Lafaek News-Baucau, 04 Novembru 2022), Prezidénsia Repúblika apoia kombustível litru rihun lima ba Koléjiu Fatumaca, hodi apoia programa fila rai destinadu ba komunidade suku 5 iha Postu Administrativu Baucau Vila no Venilale, Munisípiu Baucau.
Apoiu ne’e entrega direta husi Diretór Jerál Prezidénsia Repúblika, Domingos dos Santos Amaral bá Padre Elígio Locateli.
Tuir Diretór Jerál Prezidénsia Repúblika, Apoiu ne’ebé fó laó’s atu rezolve problema kombustível iha terrenu, maibé insentivu ida, hodi hein Governu nia intervensaun.
‘’Ohin ami lori Kombustível ne’ebé oferese husi Prezidente Repúblika, oituan ka barak, ne’e hanesan intensivu de’it maibé apoiu barak liu ne’e mai husi governu, tambá ne’e kna’ar Governu nian, Prezidente Repúlika, ajuda de’it tuir kbi’it hodi aguenta atu hein Governu nia intervensaun’’ Dehan Domingos dos Santos.
Apoiu ne’e disponibiliza tanba misionáriu sira la iha stock kombustível, hodi fila rai komunidade nian no Padre Locateli hateten, bele hakma’an difikuldade koléjiu Fatumaca nian.
‘’Bainhira ko’alia ho Prezidente Repúblika, nia aseita ha’u nia proposta ne’e, hodi ajuda 5 mill, ne’e ha’u agradese, maske tinan ne’e atraza oituan. Tinan 3 ona mak ami preokupa kona-ba fila rai no irrigasaun tradisonál ba natar no tos sira, uluk sei diák, maibé ikus ne’e tratór sira susar los tamba liu ona tinan 20, ikus mai mosu ho pandemia Covid-19, povu atu selu USD 15 iha oras ida ba fila rai, ba povu susar’’ haktuir Padre Locateli.
Reprezentante Benefisiáriu husi Suku 5, Vicente de Sousa Boavida nu’udar mós Xefe Suku Umo-Ana-Ulo, Postu Administrativu Venilale agradese Prezidente Repúblika, José Ramos-Horta ne’ebé fó apoiu ba fila rai liu husi Pe. Locatelli, SDB ne’ebé servisu ho agrikultór sira, dezde tempu portuguéz to’o agora.
‘’Kombustível ne’e sei tau ba tratór hodi fila rai ba komunidade sira husi Suku Uailili, Gariuai, Bukoli, Loilubu, Umo-Ana-Ulo, Kairui Waimeana. Kada Suku, tratór 5 sei halo operasaun hodi fila rai durante fulan ida’’ tenik autoridade lokál ne’e.
Antes ne’e, Prezidente Repúblika ajuda mós finansiamentu ba Koléjiu Fatumaca, hodi hala’o missaun hodi ajuda komunidade agrikultura no hadi’a tratór.
Jornalista : Rita Moniz
Editor : Agapito de Deus
