Lafaek News—Prezidente Repúblika José Ramos-Horta hala’o vizita traballu ba Repúblika Índia hodi partisipa iha Simeira Vibrant Gujarat ba Dala 10 ne’ebé sei hala’o husi loron 10 to’o loron 12 Janeiru 2024.
Sorumutu Globál Vibrant Gujarat, ne’ebé konseptualiza iha tinan 2003 husi lideransa vizionáriu Shri Narendra Modi, Primeiru-Ministru Índia, evolve ona iha nível globál ba rede emprezariál, fahe koñesimentu no parseria estratéjika sira ba kresimentu inkluzivu no dezenvolvimentu sustentavel.
Simeria Vibrant Gujarat ba dala-10 hala’o durante loron rua, no iha loron dahuluk Prezidente Repúblika, José Ramos Horta se loke simeira hodi ko’alia kona-ba negósiu nian iha Timor Leste inklui promove relasaun bilateral entre Timor Leste ho Índia.
“Ha’u hato’o ha’u-nia agradese bo’ot ba konvite atu aprezenta Oportunidade Investimentu iha Timor-Leste iha forum internasionál prestijiozu ida-ne’e. Ami kompromete atu kria ambiente emprezariál ida-ne’ebé favoravel, ho lejislasaun tuir prátika internasionál ne’ebé di’ak liu, atu proteje no garante investimentu estranjeiru no parseria kooperasaun ka dezenvolvimentu,” sita iha Komunikadu Imprensa ne’ebé Lafaek News asesu, Segunda-Feira (09/01/2023).
Ramos-Horta dehan, Simeira vibrante kontribui maka’as ba dezenvolvimentu nasaun sira ne’ebé sai uma-na’in no TL ho remisaun estranjeiru sai hanesan fonte importante ida ba finansiamentu ba ekonomia, nune’e Timor-Leste nasaun ida-ne’ebé pasífiku no di’ak, konvida vizitante sira, emprezáriu sira no investidór sira atu explora oportunidade foun sira.
“Ha’u hein katak sorumutu ida-ne’e sei kontinua nafatin hanesan katalizadór ida hodi promove parseria ne’ebé fó rezultadu di’ak no kontribui ba dezenvolvimentu sustentavel globál,” tenik Laureadu Nobel ba Paz ne’e.
Primeiru-Ministru Repúblika Índia sei abertura Simeira Globál Vibrante nian ba da-10 iha loron 10 fulan-Janeiru. Prezidente Timor-Leste, Prezidente Emiradus Arabes Unidus no Prezidente Mosambiki sai nu’udar Xefe Estadu iha Simeira tinan ida-ne’e nian.
Edisaun da-10 ne’e mós sei selebra tinan 20 husi Vibrant Gujarat nu’udar sorumutu internasionál ida-ne’ebé susesu iha Ázia.
Prezidente Ramos-Horta mós sei hala’o sorumutu bilaterál ho Primeiru-Ministru Índia. Repúblika Índia no Timor-Leste ativamente envolve iha setór oin-oin dezde estabelese relasaun diplomátika entre Timor-Leste no Índia iha loron 24 fulan-janeiru tinan 2003. Durante sorumutuk ASEAN-Índia nian iha Simeira ASEAN ba da- 43 iha Setembru 2023 iha Jakarta, Primeiru-Ministru, Shri Narendra Modi anunsia ona desizaun atu estabelese misaun permanente ida iha TL hodi reforsa kompromísu Índia nian ba relasaun diplomátika ho TL.
Entretantu, Viájen Xefe Estadu ne’e, akompaña husi Ministru Negósius Estranjeirus no Kooperasaun, Bendito Freitas no ofisiál seniór sira husi MNEK.
Jornalista : Epifania I. Pinto
Editór : Agapito de Deus
