Lafaek News—Prezidénsia Repúblika José Ramos-Horta atribui prémiu osan no sertifikadu ba manán na’in grupu kompetisaun Prejépiu Natál iha areadór Palásiu Prezidensiál Bairo-Pité Díli manan nain dahuluk hetan osan $ 1000.
Iha kompetisaun ne’e, ekipa juri halo selesaun no iha prejépiu hamutuk neen mak di’ak liu hodi manán prémiu refere.
Prejépiu neen ne’e, manán na’in dahuluk hetan osan dólar Amerikanu $1000 ho sertifikadu, manán na’in daruak hetan osan dólar amerikanu $800 ho sertifikadu, manán na’in datoluk hetan osan dólar amerikanu $700 ho sertifikadu, manán na’in dahaat hetan osan dólar amerikanu $600 ho sertifikadu, manán na’in dalimak hetan osan dólar amerikanu $500 ho sertifikadu, manán na’in dahaat hetan osan dólar amerikanu $400 ho sertifikadu.
Ho nune’e, grupu 19 seluk ne’ebé la manán iha kompetisaun prejepiu natal ne’e, Prezidente Repúblika atribui mós osan dólar amerikanu $250 ho sertifikadu.
Iha atribuisaun prémiu, José Ramos-Horta hateten, fó prémiu ba manán na’in prezepiu natál ne’ebé nu’udar identidade TL nian ida ne’ebé sai ai-rin ida maka’as liu mak katolisismu, no TL sai nasaun segundu maioria Katólika iha mundu.
“Parabens ba kreativu joven sira ne’ebé halo prejépiu, ha’u vizita iha oin ne’e dala hira, mesmu udan ba primeira noite seidauk prontu ha’u ba halo fotografia, halo promosaun. Parabens ba imi hotu-hotu, tinan seluk ita sei halo di’ak liu tan,” dehan Xefe Estadu José Ramos-Horta, iha Palásiu Prezidensiál Bairo-Pité Díli, Sesta-Feira (05/01/2024).
Ramos-Horta konsidera, identidade Timor ida forte liu mak katolisismu, ho omojenidade relijiozu, tensaun no instabilidades menus, signifika relijiaun bele barak maibé depende ba líder sira halo jestaun, iha Timor ita iha minoria Protestante, no minoria Muslumanu, maibé iha relasaun di’ak tebe-tebes.
Iha Timor laiha tensaun relijiozu no radikalizmu relijiaun no ida ne’e mak Prezidénsia Repúblika haree oinsá tau konsiderasaun ba kreatividade joven sira nian halo prezepiu natál ne’ebé bele sai hanesan atrasaun turístiku relijiozu ne’ebé bele dada atensaun turistas sira mai vizita Timor-Leste, ho importânsia prezepiu natál ida ne’e, Prezidénsia Repúblika no Governu hamutuk ho Igreja hola inisiativa atu fó oportunidade ba joven sira no komunidade sira halo prezepiu natál ne’ebé sai hanesan identidade kulturál relijiozu Timor-Leste nian.
Reprezentante ekipa juri nasionál, Nuno Horta Assis hateten, iha prejépiu 25 iha Palásiu Prezidente nia oin mesak di’ak, mesak furak hotu, kreativudade di’ak hotu. Maibé ne’e ita haree kompetisaun entaun balun iha oin liu, balun tuir mai.
“Susar ba ami ekipa juri na’in tolu halo avaliasaun atu fó valór, tanba mesak di’ak hotu, ami difisil atu fó valór, tanba hotu-hotu iha kreatividade di’ak, hotu-hotu badinas hatudu sira nia talentu ne’ebé di’ak, tanba ne’e ami ekipa juri deside ona manán na’in na’in neen ba tinan ida ne’e, la’os sira di’ak liu ka sira seluk ne’ebé la hetan prémiu la diak, hotu-hotu di’ak, maibé kompetisaun balun valór aas no balun valór la dun aas,” dehan Nuno Horta Assis.
Nia dehan, ekipa Juri fó avaliasaun ba konkorente sira ne’e bazeia ba aspeitu tolu mak hanesan, aspeitu kreatividade, kulturál no relijiozidade.
“Aspeitu tolu ne’e nia persentajen la hanesan, relijizidade nian 35%, aspeitu kulturál 25% no aspeitu kreatividade nian 20%,” tenik Ekipa Juri.
Komisaun Organizadór no Asesór Gabinete Sosiédade Sivil Prezidénsia Repúblika, Quintiliano Moniz hateten, inisiativa ba kompetisaun prezepiu natál ne’e mai kedas husi tinan kotuk, maibé la konsege realiza tanba Konferénsia Episcopal Timorense (CET) liuhusi Dioseze sira hasai ona karta pastoral hodi bandu halo prezepiu natál ho razaun oin-oin ne’ebé iha momentu ne’eba aprezenta.
Tinan ne’e, PR ko’ordena ho Igreja hodi realiza no ohin ita fó prémiu ba prezepiu natál sira ne’ebé di’ak liu hodi valoriza esforsu joven no komunidade sira ne’ebé halo ona prezepiu natál iha resintu Palásiu Prezidénsia Repúblika no mós iha munisípiu, no ba prezepiu natál sira ne’ebé di’ak liu hetan osan no mos sertifikadu de valorizasaun, ida ne’e Preizdente Repúblika halo atu valoriza partisipasaun joven sira nian iha kompetisaun prezepiu natál ne’e.
Jornalista :Epifania I. Pinto
Editór : Agapito de Deus
