Lafaek News—Prezidente Repúblika José Ramos-Horta bolu Ministru Defeza, Donaciano Costa Gomes “Pedro Klamar Fuik” hodi ko’alia kona-bá ko’operasaun setór defeza ne’ebé Timor-Leste establese ona ho nasaun seluk, liu-liu nasaun viziñu sira.
“Prezidente Repúblika bolu Ministru Defeza para atu bele ko’alia uitoan kona-bá ámbitu ko’operasaun ne’ebé maka Timor-Leste iha ba kuadru da defeza ho Austrália, ho Índia ne’ebé maka agora dadaun aproxima ho rai selu-seluk para atu bele haree iha dezenvolvimentu ita-nia defeza ne’e saida mak ita bele halo di’ak liu tan ho rai ne’ebé maka ita iha ko’operasaun,” informa Pedro Klamar Fuik, iha Palásiu Prezidensiál Bairo-Pite Díli, (20/12/2023).
Iha enkontru ne’e, Xefe Estadu José Ramos-Horta sujere ba Ministru Defeza atu hametin nafatin relasaun bilateral ho nasaun seluk iha setór defeza.
“Prezidente Sujere para haree nível da kooperasaun ho viziñu sira atu bele hametin ko’operasaun ne’ebé maka Timor-Leste iha ho Austrália, ko’operasaun ne’ebé Timor-Leste iha ho Indonézia hanesan viziñu imediatus ita presiza kultiva, ita presiza halo di’ak para ke ita-nia viziñu sira ho ita bele iha relasionamentu ne’ebé mak sustentave,” hakotu Ministru Defeza.
Antes ne’e Timor-Leste hametin ona relasaun bilateral iha setór defeza ho Indonézia, Austrália no nasaun seluk tan, iha área kapasitasaun rekursu umanu, apoiu infra-estrutura, ekipamentu militár no seluk tan.
Jornalista Estajiada : Epifania I. Pinto
Editor : Agapito de Deus
