Lafaek News—Reuniaun Konsellu Superior, Defeza no Seguransa iha Palásiu Prezidensiál Díli, Prezidente Repúblika José Ramos-Horta husu ba autoridade defeza no seguransa atu kontinua garante paz no estabilidade iha rai-laran.
Portavoz Konsellu Superior, Defeza no Seguransa, João Aparício Guterres hateten, reuniaun ne’e komvoka husi Xefe Estadu José Ramos-Horta hodi trata kestaun sira ne’ebé relasiona ho seguransa, defeza no soberania iha rai laran.
“Konsellu Superior Defeza Seguransa hanesan órgaun de konsulta Prezidente Repúblika nian, no mós Prezidente Repúblika rasik mak preside. Reuniaun ida ne’e, la’os reuniaun ne’ebé publika tuir lei, tan ida ne’e, rejultadu ne’ebé ohin foti iha reuniaun refere, labele fó sai,” hateten João Aparício Guterres, hafoin remata reuniaun KSDS, (23/11/2023).
Nia fundamenta, konteúdu no objetivu husi reuniaun ne’e mak, entre membru sira hotu bele halo análiza ne’ebé kle’an liu ba kestaun ne’ebé konsidera katak importante tebes ba seguransa, defeza no ba soberania rai-laran ninian.
“Konteúdu ne’e refere ba konjunta de valores, prinsípius, koñesimentu, kapasidade ou kompeténsia ne’ebé membru sira hotu kumpri, tuir lei atu garante estabilidade no paz iha ita-nia rai-laran,” dehan Portavoz KSDS.
Reuniaun KSDS ne’e, membru hotu partisipa, maibé Primeiru Ministru Kay Rala Xanana Gusmão mak la partisipa, tanba okupadu ho servisu seluk ne’ebé importante mós povu no nasaun.
Estajada : Epifania I. Pinto
Editor : Agapito de Deus
