Lafaek News—Koordenadór forsa tarefas ba prevensaun no mitigasaun surtu Covid-19, Rui Maria Araújo, informa Timor Leste rezista tan kazu pozitivu Covid-19 ema na’in 1 iha Munisipiu Baukau iha loron 2 Marsu 2021.
“Iha loron 2 Marsu 2021, detata kazu konfirmadu foun 1 iha Baukau, kazu Baukau ne’e, halo viajen husi Dili ba Baukau iha 1 Marsu 2021ho Bus Naran Mabenifa, xapa matrikula 36-806, to iha Baukau tuku 8 kalan,”esplika kordenador forsa tarefas ba prevensaun no mitigasaun surtu Covid-19, Rui Maria Araújo iha konferensia imprensa iha SIJK-SS, CCD Sesta, (5/03/2021)
Nia hatutan, iha loron 2 Marsu viziñu sira informa ba ekipa konjunta Baukau katak ema ne’e kleur ona la hela iha Baukau, posivelmente halo viajen ba fatin kontaminadu ruma, no husu atu halo test, ekipa konjunta foti amostra iha loron ne’e kedas ho ema ne’e rasik ninia konsentimentu.
“Rezultadu husi amostra ne’e hatudu Pozitivu, maibé pozitivu ho CT ( Cycle Threshold) 42, 5 ida ne’e signifika nia infetadu duni ho virus SARS-CoV-2, maske nia iha ona faze rekuperasaun no probabilidade atu nia hadadt tutan ba ema aeluk, ki’ik liu, ezemplu karik nia iha CT 37 mai kraik,” Rui Maria Araujo afirma.
Nune’e iha loron 4 Marsu, ekipa saúde repete hikas analize hodi konfirma ninia CT, maibé rezultadu ida ne’e hatudu negativu, rezultadu ida e’e konfirma katak kazu ida ne’e iha duni prosesu rdkuperasaun.
“Maske ho rezultadu ida hanesan ne’e, ekipa saúde deside atu foti amostra husi ema hotu ne’ebé kontaktu besik ho nia iha Baukau, no mós ninia kontaktu besik iha fatin ne’ebé nia bela iha Díli, iha BTN II Tasitolu, Aldeia Terra Santa, Suku Madohi, D.Aleixo Díli,” Tenik nia
Ema hamutuk na’in 17 ( 9 iha Baukau, 8 iha Díli) ne’ebé konsideradu kontaktu besik ho kazu ida ne’ebé mak halo ona teste, rezultadu hatudu negativu hotu kedas, maske negativu hotu kedas sira hotu sei nafatin iha kuarentena, hodi hein tempu ne’ebé nesesariu atu repete teste dala ida tan.
“Kazu konfirmadu foun 1 ne’e, no mós ninia membru familia sira fo hatene katak sira ida mós la halo viajen sai husi Timor-leste no la halo mós viajen ba fatin ne’ebe foin dadaun iha hela serka sanitaria, hanesan Munisípiu Bobonaro no Vovalima, ekipa konjunta iha munisipiu Baukau no Munisípiu Díli sei nafatin buka tuir kontaktu sira hotu hodi bele estabelese ligasau entre kazu foun ida ne’e ho possiveis fontes de infesaun,” Dehan nia
Tan ne’e apela ba populasaun iha Kovalima, Baukau no mós Díli atu kalma, lalika pániku, lalika rona rumor oi-oin, nafatin tuur hakmatek iha ida-idak nia fatin, wainhira la presiza la bele lao ba mai, hodi fó tempu atu ekipa saúde buka tuir kontaktu besik sira hotu hodi bele halo ezame iha laboratoriu.
Apela espesialmente ba sira ne’ebé sae Bus Mabenifa, iha loron 1 Marsu, tuku 5 loraik, husi Díli ba Baukau, atu favor aprezenta-an iha ekipa saúde sira ne’ebé besik iha imi nia hela fatin, hodi bele fó atendimentu.
Jornalista : Sandi Belo
Editór : Nelya Barros
