Lafaek News—Ministeriu Saúde deteta tan kazu Covid-19 foun na’in 5 iha aldeia Baleo-Kiik ho Mane-Kiik Suku Klauhalek, Postu Administrativu Fatumea Munisípiu Kovalima.
Koordenadór Forsa tarefas ba prevensaun no mitigasaun Surtu Covid-19, Rui Maria Araújo, hatete, Iha “Cluster” Onu-laran to ohin seidauk deteta tan kazu foun.
“Husi Cluster Klauhalek iha loron iha loron 3 no 4 Marsu 2021, deteta tan kazu konfirmadu nain 5, na’in 3 iha Aldeia Baleo Ki’ik no na’in 2 iha Aldeia Mane ki’ik, Aldeia 2 ne’e Vizino ho Klauhalek, no pertense hotu ba Aldeia Belulik Leten,” Esplika Kordenador Forsa Tarefas ba prevensaun no mitigasaun Surtu Covid-19, Rui Maria Araújo iha Konferensia imprensa iha SIJK-SS, CCD Sesta (5/03/2021).
Koordenadór ne’e afirma, Cluster Klauhalek hamutuk hotu iha kazu konfirmadu na’in 12.
“Husi kazu konfirmadu foun na’in 5 ne’e, na’in 3 estudante eskola Bázika Sentral Fatumea, Kazu konfirmadu hirak ne’e oras ne’e evakua ona mai Dili no ekipa ekipa konjunta saúde munisípiu Kovalima hamutuk ho sentru saúde Fatumea nafatin buka tuir kontaktu sira hotu, inklui estudante sira eskola Bázika Sentral Fatumea,” Dehan nia
Enkuantu dadus jeral Covid-19, loron 5 Marsu 2021 nian, Kazu Foun na’in 6, Kazu rekuperadu na’in 4, kazu ativu 25, no ema ne’ebé tama husi fronteira terrestre husi loron 1 to loron 5 Marsu, sira ne’ebé liu husi dalan regular hamutuk na’in 57 no sira ne’ebé liu husi dalan iregular hamutuk na’in 1.
Nune’e, apela ba populasaun Timor Leste tomak atu nafatin matan moris no neon na’in, prátika nafatin medida sira ne’ebé ita hotu hatene ona uza maskara, fase liman bebeik ho sabaun ka dezinfetante ruma, banhira kumprimenta malu la presija kaer liman, rei malu ka hakuak malu, evita halibur malu barak, hamrik ka tuur do’ok husi ema seluk, minimu metru ida ho balun.
Jornalista : Sandi Belo
Editór : Nelya Barros
