Lafaek News—Autoriedade Inspesaun Fiskalizasaun Atividade Ekonómiku no Seguransa Alimentár (AIFAESA) reativa hikas kompañia, Belu Dara Guia Enin (BDGE) ne’ebé hala’o indústria tempe ne’ebé hetan suspensaun durante tinan 1.
Xefe Divizaun Operasaun, AIFAESA, Idonia Sanches Pacheco, hatete, ohin AIFAESA mai reativa fali empreza, Belu Dara Guia Enin(BDGE) refere tanba sira kumpre ona rekizitu sira ne’ebé AIFAESA orienta durante tinan 1.
“Ohin loron ita mai reativa fali empreza refere nia atividade tanba priense ona rekizitus ne’ebé mak AIFAESA fo, ho ida-ne’e komesa ohin loron ba oin nia bele hala’o fila fali hanesan normál,”dehan xefe Divizaun Operasaun AIFAESA, Iha Hera, Sexta-feira, 05/03/2021.
Nia informa, kona-ba multa husi kompañia ne’ebé la kumpre rekizitus nia parte ladún hatene tanba ne’e parte jurídiku nian mak bele hatene.
Iha fatin hanesan, Diretór kompañia Belu Dara Guia Enin (BDGE), Tomas Henrique Boavida, hatete, iha fulan 2020, janeiru husi AIFAESA hapara sira nia atividade ho razaun fatin la ijiéne no durante ne’e indústria tempe ne’e paradu besik tinan ida
“Uluk fulan janeiru 2020 sira mai hapara ami nia atividade tanba dehan ami nia fatin la ijiene ne’e mak ami para kleur tanba ami nia orsamentu mak la iha ne’e mak ami buka fundus itoan tau hamutuk hadia fali fatin ne’e tuir kriteria AIFAESA fo sai no ohin sira mai re-ativa hikas ami nia atividade ne’e,”dehan diretór
Orsamentu ne’ebé kompañia indústria ne’e iha sira rasik mak tau hamutuk hodi harií indústria tempe ne’e, no iha kompañia refere kompostu husi totál ema 15
Jornalista : Egidio Nono
Editora : Nelya Barros
