Lafaek News (Laga)-Populasaun suku Soba postu administrativu Laga munisipiu Baukau dezde restaurasaun independénsia tinan 22 krize eletrisidade no estrada no la sente dezenvolvimentu
Reprezentante xefe aldeia Assanuno, Jeremias Boavida husu Kandidatu Prezidente Repúblika, José Ramos Horta, bainhira eleitu iha loron 19 Abril, tenke ko’alia ho governu hodi hadia estrada suku Soba atu populasaun sira bele lori produtu lokal asesu ba merkadu Baukau ho Dili.
Ami nia estrada ne’e too agora governu la tau matan, ukun ida ne’e ami la goja, , ami laiha eletrisidade ho estrada atu fasilita ami lori produtu ba merkadu no naroman bele tulun ami nia estuda iha oras kalan,’’’ delegadu Xefe aldeia Assanuno, Jeremias Boavida ba jornalista hafoin partisipa iha diálogu ho kandidatu José Ramos Horta iha suku Soba, segunda (11/04/2022).
Jeremias akresenta, povu hotu iha direitu atu sente dezenvolvimentu husi ukun ida ne’e, tanba povu terus fo an ba mate hodi sosa liberdade, maine povu kiik iha baze governu hateke la hetan hanesan suku Soba ohin loron laiha eletrisidade no estrada kondisaun la diak.
Suku soba kompostu husi aldeia Assanuno, Fatiliri, Laikilau, Boleha no Butufalo riku kami, nuu, fehuk mutin, batar, aifarin, inklui be tudak (airi terjun) ho be mineral, iha mos fatin istóriku iha ne’ebé uluk Falintil sira iha tempu rezisténsia.
Hatan ba, preukupasaun populasaun suku Soba kona-ba estrada ho eletrisidade, Kandidatu Prezidente Repúblika, José Ramos Horta resposta katak, nia parte labele promete fali servisu governu nian, eletrisidade ho estrada ne’e governu mak sei halo, maibé sei ko’alia ho governu ho ajensia internasional sira diretamente hodi hadia estrada ne’e urjensia atu fasilita povu agrikultor sira asesu ba merkadu.
Hanesan hau hateten, ha’u lakohi promete barak, tanba governu mak kaer programa hodi ezekuta programa, governu mak haruka osan ba parlamentu hodi deside prioridade, maibé se hetan konfiansa husi povu karik bele ko’alia maka’as komunidade suku ho aldeia ida ne’e nia moris, ha’u sei tau matan ba ida ne’e no fatin barak mos izoladu tebes,’’dehan kandidatu númeru 1, José Ramos Horta hodi resposta ezijénsa populasaun suku Soba nia ezijénsia estrada ho eletrisidade.
José Ramos Horta hatete iha diálogu ne’e, servisu prioridade ne’ebé sei halo mak tau matan ba edukasaun, saúde inan isin rua no labarik sira nia nutrisaun, labarik sira presiza konsumu produtu lokal iha rai laran hanesan hudi, fehuk, batar, aifarina no seluk tan, tanba produtu lokál fo nutrisaun di’ak ba ema nia isin liu-liu inan-isin rua ho labarik kiik oan.
Prioridade primeira ba ha’u mak kualidade edukasaun, kualidade eskola, merenda eskolar, kosok-oan sira tenke han didi’ak, tenke han aifuan, ha’u haree iha Timor-oan barak la han aifuan, dader-dader labarik sira tenke han hudi, zambia, sabraka ho modo, tanba aifuan iha vítima C, batar di’ak liu ba saúde duke foos,’’ katak Premiadu Nobel ba Paz ne’e.
Ramos Horta, afirma presiza hala’o kampaña nasional ida oinsá edukasaun populasaun sira konsumu aihan natureza ne’ebé iha vitamina ba ema nia isin, duke gasta osan sosa supermie ho foos, maibé ladún di’ak ba labarik sira nia saúde.
Buat ne’ebé governu halo estrada ho bee mos urjénsia liu, ha’u sei haree mak kualidade saúde (médiku) no kualidade eskola ho nutrisaun ba inan-isin rua ho labarik kosok-oan sira,’’ katak Horta.
Iha diálogu ne’e partisipasaun másimu militantes husi partidu CNRT, PLP inklu ho Fretilin, no hetan observasaun direta husi CNE, hafoin remata diálogu iha suku Soba, kandidatu númeru 1 ne’e kontinua viajen fila ba Dili hodi kontinua kampaña iha Tasi-Tolu tersa (12/04/22), no ekipa ida lideradu husi prezidente partidu PSD kontinua hala’o diálogu ba suku Keulekai.
Jornalista : Agapito de Deus
Editor : Floriano Soares
