Lafaek News—Relasiona ho intensidade udan boot iha fulan Marsu tinan ne’e, iha munisípiu Ermera dezastre matureza sobu ponte entradas principal 5 kompostu husi ponte Manholeta, Lakugoa, Raetara, Villa-Maria no ponte Atara.
Ponte hirak ne’e nu’udar ligasaun prinsipal ba postu administrativu haat (4) hanesan Hatulia A, Hatulia B, Letefoho no Atsabe, ba da-daun hasusar movimentasaun transportes públiku ne’ebé transporta nesesidade bázika hirak hanesan foos ho mina ba merkadu iha postu administrativu hirak ne’e atu populasaun sira sosa hodi konsumu.
Situasaun jeral iha munisípiu Ermera populasaun husi postu administrativu haat sente triste no lamentavel ho kondisaun estrada ne’ebé sobu husi udan boot iha fulan Marsu tinan ne’e, nune’e reprezentante populasaun husi postu haat liu husi Uniaun Estudante Universitariu Munisipiu Ermera (UNEUMER) realiza konferénsia imprensa relasiona ho dezastre ne’ebé akontese iha munisípiu Ermera, kona-ba kondiasaun infraestrutura ne’ebé akontese iha loron 16 fulan Marsu 2023, too mai ohin loron seidauk renormaliza ponte liga postu haat ne’e.
“UNEUMER hakarak agradese ba MOP ne’ebé dadaun ne’e kolabora hamutuk ona ho autoridade munisípiu Ermera nian hodi responde urjénsia maibe ami nafatin husu no ezije ba MOP ho razaun husu MOP propoin kompañia ida ne’ebé mak iha kapasidade hodi normaliza fatin destroidu hirak ne’e ho garantia ba sustentabilidade ho kualidade iha tempu naruk, katak afirma portavóz UNEUMER, Elderito Pinto Salsinha ba jornalista sira foin lalais ne’e.
Portavoz UNEUMER ne’e akresenta desastre natureza ne’ebé mosu iha munisípiu Ermera presiza duni intervensaun urjénsia nune’e fasilita povu kiik renormaliza sira nia moris ho razaun povu kiik balun laiha aihan rezerva iha uma laran nu’udar rezélensia hasoru dezastre naturais.
“Ami hakarak ezije ba MOP katak labele responde de’it ho karakter urjénsia hodi fasilita iha momentu kampaña eleitoral no eleisaun parlamentar, Tanba da-daun tama ona iha tinan polítika,ezije ba atu identifika kompania ne’ebé iha kualidade no kapasidade atu garantia projetu ho kualidade atu labele lori difikuldade ba movimentasaun povu kiik iha baze liu-liu munisípiu Ermera, portavós ne’e UNEUMER ne’e hakotu lia.
Estajiada : Julia Guterres
Editor : Agapito de Deus
