Lafaek News—Centro Nasional Chega lansa akordu ofisial ida ho sobreviventes husi funu ba ukun rasik hodi tau matan sira (sobrevivente) nia oan ba eskola liu husi programa Bolsa Hakbiit.
“Iha tinan kotuk ita atribui ona na’in hitu hala’o estudu iha Universitariu sira iha Dili laran, maibé iha tinan ida ne’e ita atribui tan na’in (5), liu husi atribuisaun ne’e rasik bazeia ba dadus ne’ebé mak ita hetan husi asosiasaun vítima, husi asosiasaun polítika, no husi hakbi’t Asia, ne’ebé mak durante tinan naruk halo akompañamentu ba sira nia inan-aman ne’ebé mak sai vítima iha funu laran,” katak diretor ezekutivu CNC, Hugo Maria Fernandes ba jornalisra sira iha eis Komarka Balide Sesta semana ne’e.
Hodi dehan Centru Nasional Chega nu’udar instituisaun públiku, iha ne’ebé estadu harii atu tau matan ba sobrevivente sira ne’ebé mak mukit liu, liu husi sira nia oan ne’ebé mak iha kompremisu bo’ot hakarak kontinua estudu iha nivel ida bo’ot liu, maibé husi aspeitu finansial nian halo sira nia inan-aman laiha kbi’it, liu husi Centru Chega planu program ida kona-ba bolsu estudu hodi atribui ba sira nia oan hodi kontinua estudu iha ensinu superior.
“Liu husi bolsu estudu ne’ebé mak CNC halo bele tulun no hakman ona sira nia inan-aman ninia preokupasaun ne’e moris iha mukit nia laran, ita hatene katak sobrevivente ba ida ne’e vítima barak, maibé la’os vítima hotu-hotu iha kondisaun ida mukit, tanba vítima balun ou prizoneiru balun agora sai emprezáriu, no sai polítiku no balun sai membru governu,” Hugo dehan.
Sorin seluk sobrevivente, Manuela Leon Perreira, sente kontenti ho tulun husi Centru Nasional Chega atribui ba sobrevivente sira nia oan liu husi bolsu estudu, agradese ba oportunidade ida ne’e, durante ne’e hakarak atu kontinua iha nivel universitáriu, maibé moris ho familia ne’ebé mukit labele kontinua.
“Durante ne’e ha’u hakarak loos atu kontinua iha nivel universitariu, maibé moris ho kondisaun familia nian ne’ebé mukit tebes, ami labele asesu iha universitariu sira iha Dili laran, tanba ne’e liu husi oportunidade ne’ebé Centru Chega atribui bele hakman ona familia no inan aman nia moris ne’ebé durante ne’e moris iha mukit nia laran, liu husi oportunidade ne’e mós la’os ha’u mesak deit, maibé hamutuk ami na’in sanulu resin rua (12) mak bolsu hakbit ida ne’e, tan ne’e hanesan nia parte orgullu no agradese ba Centru Nasional Chega”. Nia hakotu.
Estajiadu : Crispin Amaral
Editor : Agapito de Deus
