Lafaek News—Prezidente Partidu Congressu Nasional Rekonstrusaun de Timor (CNRT), Kay Rala Xanana Gusmão, konsidera ukun an ida ne’e mai husi ferik ho katuas sira ne’ebé ba da-daun moris iha susar no terus nia laran, ohin loron ema barak goja liberdade.
Xanana hatoo Asuntu ne’e iha ámbitu konsolidasaun partidu CNRT iha Aimutin Sentru suku Komoro postu administrativu Dom Aleixo munisípiu Dili, kinta (30/03/2023), katak autor principal ba ukun rasik mai husi ferik ho katuas sira.
“Luta ba ukun rasin an ida ne’e mai husi dedikasaun no kontribuisaun husi ferik ho katuas sira nian mak ohin loron ita hotu goja ukun an ida ne’e,” katak lider karizmátiku ne’e iha nia diskursu polítika iha serimonia konsolidasaun refere.
Nia hatete, dedikasaun no kontribuisaun ne’ebé ferik ho katuas sira terus durante tinan rua nulu resin ha’at nia laran (24), tenki valoriza no dignifika sira nia terus no susar ne’ebé sira hasoru durante tinan 24 nia laran, tanba ita haree iha erra ukun rasik an ida ne’e, ferik ho katuas barak mak sei moris terus no susar iha rai ida ne’e.
“Ha’u nia kompremisiu husi partidu polítika nian ba ferik ho katuas sira ne’e luta durante tinan 24 nia laran, bainhira kaer ukun sei fó atensaun espesial ba ferik ho katuas sira ne’ebé terus no susar iha presaun nia laran hodi ita manan ukun rasik an no manan ita nia soberania maibé sira la manan osan”. Xanana Informa.
Nia hatutan iha tinan 1999, ferik ho katuas sira nia kontribuisaun ba rai ida ne’e ho votus ida de’it, hakarak liberta rai Timor, tanba ho sira nia terus no sakrífisiu mak ohin loron sira liberta duni ba rai ne’e, la’os duni inimigu ho kilat musan, ita duni inimigu ho ferik katuas sira nia esforsu no dedikasaun duni mak ohin loron ita liberta rai ida ne’e.
“Estadu ne’e tenki iha obrigasaun bo’ot tebtebes ba ferik ho katuas sira nia kontribuisaun no dedikasaun ba rai ida ne’e, tanba ne’e partidu CNRT, kompremetidu bainhira kaer ukun agora tau importansia sosial liu ba ferik ho katuas sira ne’ebé ohin loron sei moris iha situasaun frasil nia laran. tenik Xanana,” Xanana Gusmão hakotu lia.
Estajiadu : Crispin Amaral
Editor : Agapito de Deus
