Lafaek News—Prezidente Repúblika José Ramos Horta sei nomeia Diretór Ezekutivu Permakultura (PERMATIL), Artisita Lejendári, Ego Lemos hanesan embaixadór boa vontade ba meiu ambiente iha Kultura
“Iha fulan Abríl nia laran Ego Lemos sei ba Asutrália maibé antes nia bá Austrália ha’u sei nomeia nia hanesan Embaixadór boa vontade ba meiu ambiente iha kultura hanesan Embaixadór boa vontade títulu ida nasaun unidas Sekretáriu Jerál nomeia Embaixadór boa vontade dala barak autór famozu ida mak sai hanesan Embaixadór boa vontade nasaun unidas nian”, katak Presidente Repúblika José Ramos-Horta iha Palasiu Prezidensiál Bairu-Pite tersa( 28/03/2023).
Xefe Estadu ne’e haktuir, estadu orgullu Timor-oan hanesan Ego Lemos ne’ebé tau matan maka’as ba meiu ambiente ba ekolojia, green ekonomia ba dezenvolvimentu komunitária liu husi hametin rekupera bee matan.
“Nomeiasaun ne’e sei halo seremónia ofisiál iha fulan Abríl semana ida ka rua nia laran, antes Ego Lemos hetan ba Austrália”, dehan Prezidente Ramos-Horta.
Nia dehan, Xefe Estadu primeira Prezidénsia nomeia Kirsty Sword Gusmão Embaixadora boa vontade ba edukasaun, Embaixadór boa vontade ne’e liu-liu sistema nasaun unidas Sekretáriu Jerál mak halo ida ne’e, Prezidente Repúblika ho Sekretáriu Jerál hili ema ida atu sai Embaixadór boa vontade.
“Ego Lemos Embaixadór meiu ambiente, envairoment no kultura tanba ne’e nia servisu tinan hira nia laran dezde joven to’o agora, orgullu ida ba Timor tanba Timoroan ida mak Embaixadór boa vontade Timor Leste nian, no sei servisu hamutuk liu tan ho Prezidensia Repúblika, primeiru prezidensia apoia inisiativa ne’ebé PERMATIL halo atu hadia liu tan ita iha meiu ambiente”.
Iha fatin hanesan Diretór Ezekutivu Permakultura Timor Leste (PERMATIL), Ego Lemos lori PERMATIL hato’o sentimentu orgullu ba Prezidente Repúblika José Ramos-Horta maske seida’uk ofisiál deklara atu ba Embaixadór boa vontade ba meiu ambiente.
“Ha’u sente orgullu tebe-tebes tanba Xefe Estadu seidauk ofisiál maibé ohin bele deklara katak hakarak nomeia ha’u ba Embaixadór boa vontade ba meiu ambiente agrukultura antes ida ne’e maluk sira hatete ha’u halo servisu ida ne’e kleur ona liu-liu ba ambiente no mós múzika ne’ebé ha’u prontu katak Xefe Estadu nomeia ha’u atu reprezenta nasaun no povu Timor Leste”, katak diretór Ezekutivu Permakultura Ego Lemos.
Nia hatete, Viajen ba Asutrália iha fulan Abríl hetan konvite atu lidera forum lian Timor atu halo tour múzika, iha festival hitu, alende ne’e mós sei halo gravasaun múzika iha Darwin.
“Nune’e mós iha Timor sei problema bee, Timor maske nasaun kiik maibé iha tékniku ne’ebé di’ak bele fahe ho nasaun seluk ne’ebé sira hasoru problema hanesan, entaun Timor konsege deskobre oinsá hamosu fali bee matan ne’ebé mais fasil ida ne’e mak atu fahe fali ba nasaun sira seluk”.
Jornalista : Rita Moniz
Editór : Agapito de Deus
