Polísia Prende SDSB Illegal Iha Beto Barat
Lafaek News—Polísia Nasionál Timor Leste (PNTL), domingu (14/02/21), kaptura Timor-oan ida ho inisial FM iha uma kos parte Beto Barat suku Madohi postu administrativu Don Alexo munisípio Dili tanba hala’o negósiu SDSB illegal.
“Uma ne’e ha’u nian, ha’u fo aluga duni ba sira durante tinan rua sira hela, maibé sira halo atividade ida ne’e ha’u la hatene ohin polísia sira mai ona mak ha’u foin hatene,” dehan uma na’in, Florinda Ximenes Guteres, ba Lafaek News iha fatin akontesementu aldea Anin-Fuik suku Madohi, domingu (14/02/21).
Florinda Ximenes Guterres nu’udar uma na’in relata katak, uma ne’e suspeitu aluga tomak durante tinan rua ona hodi hala’o atividade fa’an SDSB ne’e.
Ekipamentu ilegal hirak ne’ebé polísia sita mak hanesan printer unidade 3, mákina ida tesi surat tahan SDSB marka Amizade, suspeitu iha fen no oan feto na’in rua polísia lori hotu ba ekuadra polísia Don Aleixo Aimutin.
Tuir informasaun katak, antes ne’e iha dadeer san de’it, suspeiru ne’e mós hafuhu viziñu ida iha hariis fatin hodi hasai fotografia, ikus mai família viziñu sira konsege hetan no atu halo agresaun fíziku ba suspeitu refere, maibé la konsege tanba suspeitu rasik ba entrega an iha polísia eskuadra Komoro.
Jornalista : Acacio Pinto
Editora : Nelya Barros
