Lafaek News—Ohin, Domingu (14/02/21), Ministériu Saúde, rejista tan kazu foun Covid-19, sidadaun Timor-Oan mane ida hala’o viajen ba iha Atambua Indonézia liu husi dalan Ilegal no fila mai mos husi dalan Ilegal teste rezultadu hatudu Pozitivu Covid-19.
“Ohin 14 fevereiru 2021 husi komisaun nasionál rejista tan kazu konfirmadu pozetivu Covid-19 Timor-oan na’in 1, Pasiente ne’e mane ho idade 20, asimtomátiku,” Esplika Spot MBiomed Kordenador Pilar VII Covid-19, Nilton do Carmo da Silva, Iha konferensia imprensa, Palasiu das Sinzas Kaikoli, Domingo semana ne’e.
Koordendor Pilar VII ne’e hatutan, Iha loron 5 fevereiru 2021, sidadaun Timor-oan ne’e sai husi Timór ba Atambua (NTT) liu husi dalan ilegál ho objetivu bá vizita família (Inan-kiik) mate no hela iha ne’e bá durante loron 5 no iha oron 10 fevereiru 2021, nia fila husi Atambua mai Timor-Leste liu husi dalan ilegál área Tunibibi nian, Munisípiu Bobonaro.
Entretantu, iha Tunubibi nia ba Maliana Vila ho motór (ojek), maibé nia la kuñese, husi Maliana vila kontinua viájen ba postu Administrativu Bobonaru ho Angguna (transporte públiku), Iha Angguna laran iha pasajeiru hamutuk ema na’in 11 inklui motorista no ajudante (konjak), to’o iha área Suku Lourba, Bobonaro, sidadaun ilegál ne’e no mós pasajeiru na’in 4 tun husi angguna kontinua ba to’o iha postu Bobonaro Vila.
“Ilegál ne’e informa katak Iha Bobonaru nia hela mesak iha nia uma no laiha família ida hela ho nia, loron tuir mai komunidade iha área nia hela informa ba autoridade lokál no mós seguransa polísia ho parte vijilánsia munisípiu foti kedas sidadaun ne’e mai eskuadra PNTL Maliana vila hodi halao investigasaun,”Tenik Kordenador ne’e
Nune’e, remata tiha investigasaun iha 11 fevereiru ekipa vijilánsia Munisípiu nian lori sidadadun refere bá iha kuarentena Batu-Gade, Swab teste foti 13 fevereiru no rezultadu pozitivu relata iha dia 13 fevereiru.
“Serbísu vijilánsia munisipál Bobonaru ho autoridade seguransa iha Maliana identifika no hetan ona kondutór angguna ho nia ajudante ida-ne’ebé tula Ilegál pozitivu Covid-19 no submete ona ba kuarentena Batu-Gade, da-daun ne’e ekipa sei buka tuir (contact tracing) pasajeiru hotu iha angguna refere, iha balu ekipa identifika ona no ekipa kontinua buka tuir nafatin,” dehan nia
Tan ne’e, atu dehan de’it katak solusaun di’ak liu ba iha komunidade no nasaun Timor-Leste maka sidadaun hotu tenki hakmatek iha fatin, labele hakat fronteira tama no sai, tanba atetude ne’e sei lori perigu boot ba populasaun tomak iha Timór.
“Iha inísiu kedas Covid-19 ne’e mosu iha ita-nia rai to’o agora ho ita-nia serbísu maka’as ohin loron hodi laiha transmisaun iha komunidade. Maibé ho maneira ema ida-rua ne’ebé laiha responsabilidade, Transmisaun lokál ka transmisaun komunidade bele mosu iha tempu saida deit,”tenik nia
Tuir dadus Covid 19, ohin Loron 14 fulan Fevereiru 2021, kazu komulativu hamutuk 102, Kazu Foun 1 total pozitivu Ne’ebé da-daun Baixa hamutuk ema na’in 40.
Jornalista : Sandi Belo
Editora : Nelya Barros
