Lafaek news –Rosa Verificação ho idade 64, foti desizaun rasik sosa modo husi merkadu Taibessi, kesi halo futun ida sentavus 50, hodi leba la’o iha sidade Dili hodi buka osan sustenta uma laran, tanba nia kaben (laen) rasik afeta moras iis boot iha ne’ebé tuur de’it iha uma.
Moris iha sidade Dili presiza servisu maka’as hodi hetan osan hodi sustenta moris loro-loron, tanba nesesidade hotu presiza osan, moris iha sidade konsikuénsia maka’as afeta iha ekonomia uma laran, sa tan mane ne’ebé nu’udar xefe família laiha servisu susar atu moris ambiente ekonomia ida ne’ebé saudavel.
“Ha’u nia laen moras iis bot tinan lima ona ona no labele halo buat ida,la buat ida ha’u mak sai fali hanesan xefi familia buka osan hodi suporta oan sira no no hola hahan uma laran, moris iha mundu iha balun moris kiak no balun moris riku ,maibé ha’u kiak ha’u ha’u lakoi atu tane liman ba ema seluk,” dehan Roza ba jornalista lafaek news iha Maufelu Bekora sesta semana ne’e hafoin leba hela modo husi Bekora atu ba Audian.
Iha biban hasoru ho jornalista Lafaek news iha ponte Maufelu ne’e, Rosa relata nia ho nia kaben iha oan hamutuk ema na’in 9, na’in rua mate tiha hela na’in 7, kompostu husi feto rua ho mane na’in 5, sira na’in hitu ne’e eskola hotu, maibé la konsege remata tanba laiha osan atu selu sira nia eskola too finaliza iha ensinu sekundáriu.
“Ha’u nia oan nain 9, maibé rua mate tiha no agora hela nain hitu de’it ,maibé sira na’in hitu nee eskola la hotu to sai tanba ha’u nia laen moras osan laiha hodi hodi suporta oan sira ba eskola,” dehan nia
Rosa dehan tan, nia sai husi uma Kulau Bekora tuku hitu dadeer eba modo tahan fa’an iha Dili, dala ruma udan no dala ruma mós loron manas, maibé pasiénsia de’it la’o nafatin too tuku 6 lokraik foin fila fali ba uma.
“Ha’u sai husi uma kulau Bekora tuku hitu dader leba modo tahan ba faan ,ha’u senti triste tamba modo neebe mak ha’u faan ema la hola , senti loron manas ,ha’u deskansa oituan hemu tiha bee hafoin mak ha’u leba modo nee ba faan tan no modo neebe mak ha’u faan dala ruma ema sosa no dala ruma ema la sosa too ha’u lori fila ba uma de’it , maske ha’u feto, maibé ha’u lakohi hodi tane liman ba ema seluk “, nia hakotu
Rosa, hasai lia ikus bainhira atu fahe malu ho jornalista ne’e, nia dehan, moris hanesan ema kiak, maibe labele tane liman, se bainhira liman fuan sanulu sei funsiona hela tenke buka rasik osan, maski rendimentu loron ida hetan dolar 2 too 4, bele sosa netik foos haknauk hodi ha’an.
Jornalista : Domingas Viana
editora : Nelya Barros
