Lafaek News-Polísia Maritíma Korea do Súl buka tuir hela Traballadór Timór-oan ida mout iha tasi ho naran João do Rosario ne’ebé hela iha sidade Wando Tanji Pe, Korea do Súl.
Traballadór Timór-oan ho naran João do Rosario husi Munisípiu Bobonaro postu Administrativu Kailaku, suku Meligu ne’ebé mak mout iha tasi, iha loron 23/03/2021, meudia bainhira halo hela servisu peskas iha ró laran.
Tuir traballadór Timór-oan ne’ebé servisu iha Korea do Súl, Pedrito Murak Bareto ba lafaeknews.com liuhusi via telefone, hatete, vitima refere servisu iha parte sidade ida naran wando no belun ne’e servisu iha área Peskas no sira nia servisu halai liu ba servisu iha ‘Tanji pe’ ka ho lian tetun dehan ikan kiik.
“Belun ne’e sai husi uma, iha dader madrugada mais ou menus tuku 5 no servisu hamutuk ho nia belun kapitaun lori Ró iha meudia maiz ou menus 12 resin iha asidente ne’ebé ita la espera tanba belun hamutuk de’it ho ema rai na’in,” dehan Pedrito ba lafaeknews.com liuhusi via WhatsApp, Kuarta (24/03).
Iha sorin seluk, Cornelio Henrique, hanesan vitima nia kolega traballadór iha Korea Súl, hatete, kolega halo hela servisu iha tasi laran mak nia monu sai husi ró laran ba kedas iha tasi laran.
“Agora ami buka, maibé seidauk hetan to’o agora, ne’ebé agora ami sei liga hela ba familia sira iha Timor husu sira nia orasaun atu bele hetan lalais belun ne’e,” dehan Cornelio.
Nia dehan, polísia maritima Korea Súl nian no forsa aero agora dadauk sira buka tuir hela vitima nia isin lolon, maibé to’o agora seidauk hetan tanba iha área ne’ebá agora dadaun mosu klima salju maka’as, maibé polísia nafatin esforsu buka belun ne’e, nia isin lolon no agora dadauk patraun entrega a’an tiha ona ba polísia no adidu husi Timor Leste.
Tanba Adidu husi Timor-Leste mak responsavel ba traballadór Timór-oan sira ne’ebé ba servisu iha Korea do Súl.
Antes ne’e notísia ne’e tuun, lafaeknews.com tenta konfirma ho Adidu Husi Timor Leste ne’ebé mak Responsavel ba Timór-oan sira ne’ebé servisu iha Korea do Súl, maibé seidauk responde, tanba sei okupadu uituan ho Traballadór Timór-oan ne’ebe mout Iha tasi laran.
Jornalista : Egidio Nono
Editór : Floriano Soares
