Lafaek News— Polísia Nasionál Timor Leste (PNTL), kaptura ona suspeitu ho inisíal JA ne’ebé involve iha kazu sona matebian Ernesto dos Santos, iha merkadu Taibesi sábadu maizimenus tuku 12:41 OTL madrugada.
Vítima Ernesto dos Santos (34), hosi suku Bereleu, postu administrativu Liquidoe, munisípiu Aileu. Matebian hanesan vendedór modo hetan sona hosi suspeitu ho inísial JA ho nia maluk iha hirus matan parte liman los.
Segundu Komandu PNTL munisípiu Dili informa katak kaptura ona autór prinsípal ida hosi kazu refere iha terminal Tasitolu bainhira autór ne’e atu transporta aan ou halai ba Maliana ho transporte públiku (Bus).
“PNTL kaptura ona JA iha terminal Tasitolu, ho ran balun sei turuk iha nia ain lolon. Deskonfia iha kazu refere la’ós de’it suspeitu JA maibé ho nia maluk na’in ida tan ho inisíal L, maibé polísia esquadra Na’in Feto foin kaptura de’it JA falta nia kolega,” informa segundu komandante komandu munisípiu Dili, Superintendente Asistente Euclides Belo, ba jornalista sira iha KMD-Kaikoli, segunda (30/11).
Haktuir nia, suspeitu JA daudaun ne’e detein ona iha sela komandu munisípiu Dili hodi kumpre 72 oras, antes lori ba tribunál atu tuir primeiru interogatóriu.
Hatutan nia, kona-ba suspeitu ho inisíal L ne’ebé seidauk kaptura, komandu PNTL kontinua buka tuir nafatin, tanba rekolla hotu ona informasaun sobre suspeitu refere no kuaze tama hotu ona iha liman PNTL teritóriu laran tomak. Dehan nia, nune’e la kleur tan sei kaptura hodi nia (suspeitu L) hamutuk ho nia maluk ne’ebé kaptura tiha ona responsabliza ba aktu krime ne’ebé sira komete.
Alende ne’e tuir sasin Filomena Bento, katak momentu ne’e iha ema na’in Hat (4) tuur hemu hela tua tradisionál (Sabu) hodi ikus rezulta akontese kazu krime omesídiu refere.
“Momentu ne’e vítima sama Aqua (Massa Bee Minerál) mamuk tarutu. Entaun suspeitu sira bolu vítima dehan o sadik ka o jagoan, hafoin vítima fila oin suspeitu ho inisíal L hamarik lori tudik sona kedas iha nia hirus matan parte liman loos, ho nune’e vítima monu ba rai, ha’u ho ha’u nia mane foun mak foti vítima ne’ebé latan hela iha rai lori ba postu polísia Taibesi, nune’e bele hetan tulun ruma hodi transporta lalais ba ospitál,” nia konta.
Jornalista : Orlando Magno
Editor : Ezequias Tomas
