Lafaek News—Komandu Jerál Polísia Nasionál Timor Lorosa’e (PNTL), sei foti asaun ida mais rigorozu hasoru ema ne’ebé sunu inklui empreza ne’ebé mak fa’an paisaun ka petasan sein hetan lisensa ruma hosi Ministériu Turizmu Komérsiu no Indústria (MTKI).
Portavós PNTL Superintendente Xefe Arnaldo de Araújo, afirma família nia papél importante tebes atu eduka oan hodi respeitu ema seluk. Tanba ne’e nia hatete, bainhira falta ou menus kontrolu entaun oan sira sai ba komete aktu oioin, ne’ebé la’ós de’it prezudika ba aan rasik maibé ba mós ema seluk.
“Dala barak ita rona paixaun tarutu, ema balun sente baibain maibé balun bele hakfodak, no hetan atakasaun i bele mós mate fatin. Tanba ne’e husu inan aman tenki tau atensaun ba oan sira,” dehan portavós PNTL Arnaldo ba jornalista, iha Komandu Jerál PNTL Kaikoli-Dili, tersa (01/12).
Nia reforsa, komersiante ne’ebé malandru obriga aan fa’an paisaun ka petasan sein iha karta koñesimentu ruma hosi ministériu kompetente, maka obrigatóriumente PNTL sei foti medida ida mais forte.
Nune’e ikus nia afirma, kuandu hadomi nasaun no aan rasik, labele kompra sasán hirak ne’e, no labele koko atu lori sasán ka petasan tuir dalan Laho (jalan tikus), tanba alende lori petasan, bele lori fali mós Covid-19 tama mai ita rain.
Tanba ne’e, Komandu Jerál orienta ona membru sira iha teritóriu laran tomak atu halo operasaun através ho karreta no la’o ain tama sai kada bairru.
Jornalista : Orlando Magno
Editor : Ezequias Tomás
