Lafaek News—Prezidente Institutu Jestaun Ekipamentu, Institutu Públiku (IJE,IP), Ermenegilda da Costa Laurentina hateten, IJE,IP hadia ona estrada iha suku Muapitine ho Lospalos Vila ne’ebé atinji ona porsentu 100.
“IJE,IP prontu atu fó apoiu reabilitasaun estrada iha suku sira seluk iha teritóriu Timor-Leste,”dehan Ermenegilda ba jornalista iha Gabinete Prezidente IGE, Kolmera Dili, kinta 27/11/2020.
Nia relata, da-daun ne’e IJE kontinua reabilita estrada ne’ebé liga suku Muapitine ho suku Fuiluru ho naruk kilómetru 21, finaliza ona kilómetru 17 no falta kilómetru 4.
Nia esplika, Reabilitasaun estrada ne’e halo hafoin Sekretariu Estadu Komunikasaun Sosial (SEKOMS) husu apoiu ba IJE,IP bazeia ba pedidu husi autoridade no komunidade suku.
“Responsável máxima IJE,IP orienta tékniku sira atu foti mós dadus kona-ba reabilitasaun estrada iha suku Lore I no Lore II bazeia ba pedidu husi SEKOMS liu hosi programa Naroman ba Suku,” nia hatete.
Prezidente IJE,IP informa, iha fulan kotuk xefe suku Rotutu, Munisípiu Manufahi aprezenta pedidu reabilitasaun estrada ba IJE,IP, maibé ekipa tékniku sei ba foti uluk dadus, antes halo reabilitasaun.
Ermenegilda dehan, IJE,IP koloka ninia brigada servisu iha munisípiu sanulu-resin-rua inklui RAEOA, iha ne’eba suku lima to’o hitu kada munisípiu maka iha dadus kompletu ne’ebé rekolla husi ekipa tékniku atu hetan apoiu reabilitasaun estrada husi IJE.
Jornalista : Orlando Magno
Editora : Nelya Barros
