Manatutu-(Lafaek News)-Komunidade aldeia Hatucona, suku Lacumesak, postu adiministrativu Laclo, Munisípiu Manatutu, durante tinan 20 seidauk asesu ba eletrisidade, tanba ne’e sira sente katak ukun aan ida ne’e saugati de’it.
Jornalista Lafaek News Joao da Costa Soares entrevista hela komunidade aldeia Hatu-Cona, Valente da Silva Guterres iha Hatu-Cona, Foto LN Riky.
Komunidade Valente da Silva Guterres, ba LafaekNews relata, hahú hosi tinan 2000 to’o 2020 kontinua moris de’it iha nakukun laran, ho nune’e liafuan ida baibain bo’ot sira sempre temi katak bainhira ó tu’u ba ha’u, ha’u mana sei hadi’a estrada no eletrisidade, maibe realidade la hatudu iha asaun konkreta.
“Na’i ulun sira nunka hatan ba ami nia ezijénsia (Dada eletrisidade mai ami nia aldeia). Ne’e nunka akontese, ho nune’e mak ami povu iha suku Lacumesak aldeia Hatucona, sente katak mezmu ukun-an ona maibé ba ami ne’e seidauk sente,” Komunidade Valente informa problema ne’e iha aldeia Hatucona, domingu (29/11).
Adianta nia, durante tinan naruk nia laran uza de’it ahi oan tradisionál, no iha tinan hirak ba kotuk ne’e mak foin uza netik Solar Panel ou enerjía loron matan (tenaga surya) ne’ebé fasilita hosi Avelino Coelho.
Tanba ne’e hatete nia, ho situasaun refere difikulta tebes ba sira, no sempre hato’o problema ne’ebé enfrenta ba governu através hosi xefe suku aldeia ne’e nian rasik, atu nune’e bele hato’o fali ba governu solusiona lalais problema refere.
Entretantu iha sorin seluk responde ba preokupasaun refere, xefe suku Lacumesak, Filomeno Rodrigues Cárceres, rekoñese mós katak, iha ninia suku kompostu hosi aldeia 5, no iha aldeia 2 hosi aldeia 5 ne’e mak seidauk asesu ba eletrisidade liuliu maka aldeia Hatucona.
Dehan nia, preokupasaun ne’ebé povu iha baze hato’o sempre transfere ba nasionál liuhosi halo proposta maibé ate a data seidauk iha resposta ruma.
“Hanesan autoridade husu ba governu hanoin netik ami hirak ne’ebé mós hanesan sidadaun ba rai ida ne’e nian, loke matan ba, hodi tau hanesan prioridade ida mós nune’e ba oin bele ona implementa (dada eletrisidade),” nia tenik
Entretantu populasaun iha Suku Lacumesak hamutuk rihun rua atus walu sianulu resin walu (2898), populasaun husi Aldeia rua ne’ebè seidauk asesu ba Eletrisidade dezde okupasaun Indonezia too ohin loron hamutuk atus hitu ualunulu resin walu (788), aldeia Hatucona uma kain hamutuk atus ida sanulu resin haat (114), Ho total populasaun atus neen hitunulu resin walu (678).
Jornalista : João da Costa Soares
Editor : Ezequias Tomás
