Lafaek News–Komandu Polísia munisípiu Dili, husu komunidade sira bainhira atu halo festa kazamentu bele husu ajuda Polísia Nasionál Timor Lorosa’e (PNTL) hodi fó seguransa.
Segundu Komandante PNTL Munisípiu Dili, Superintendente, Euclides Belo, hatete komunidade iha kapitál nasaun hotu-hotu iha direitu atu hala’o festa ruma, maibé hare ba ikus-ikus ne’e sempre mosu problema, entaun komunidade bele liga direita ba PNTL hodi bele fó seguransa to’o festa ne’e ramata.
Dehan nia, Komandu Munisípiu Dili nia motto “Servisu hamutuk kapitál Dili seguru ba ema hotu.” Tanba ne’e, komunidade Dili tenki koopera ho PNTL hodi fó seguransa ba ita nia sidade.
“Kualker atividade hanesan serimónia ka festa privadu, bele infoma mai ami ou bele haruka karta nune’e ami bele tau iha programa operasionál hodi garante seguransa ba atividade ne’e,” informa Euclides ba jornalista sira, iha KMD Kaikoli-Dili, Segunda (30/11).
Segundu Komandante Polísia Munisípiu Dili haktuir hodi fó hanoin ba festa na’in, bainhira membru PNTL ba halo seguransa bazeia ba karta koñesimentu ne’ebé selebrante seremónia ka festa na’in hato’o mai Komandu, labele fó fali tua ba Polísia sira ne’ebé halo hela ninia servisu.
Alende ne’e nia mós husu, ba festa na’in labele fó tua barak liu ba joven liuliu konvidadu sira tanba maioria problema mosu iha festa laran ne’e tanba kauza hosi konsumu alcohol mak barak.
“Kuandu ema ida mak konsumu alcohol barak, bele kontamina ninia pensamentu, entaun amigu sai inimigu no sasán iha tenda laran bele hetan estragus hotu,” nia tenik
Jornalista : Orlando Magno
Editor : Ezequias Tomás
