Lafaek News—Relasiona ho akontesimentu iha Lakluta ne’ebé komete hosi benefisiáriu balun sunu sasán iha fatin distribuisaun programa Cesta bázika, MKAE afirma kuandu lakohi simu lalika tenta halo violénsia tanba estadu sei la tolera pesóal ne’ebé ‘malandru’ hakarak trava programa governu nian.
Tuir governante ne’e, kona-ba akontesimentu ne’ebé akontese tanba populasaun la satisfaz ho distribuisaun sasan sexta bazika ne’ebé aplika husi governu, tanba diskonfia sasan la to’o folin $25 dolar no sasan maioria importadu
“Estadu deside polítika dala ida. Ne’ebé ida-ne’e lei ona, sé mak lakohi simu lalika tenta halo violénsia, tanba ha’u hanoin ida-ne’e la’ós atu fó solusaun. No dalan ba reklamasaun iha fatin meza ida para halo reklamasaun, tanba dalan atu aprezenta reklamasaun ne’e dalan ne’e iha hela,” MKAE hatete, iha Resintu PN, tersa (01/12).
Governante ne’e dala ida tan reforsa, aktu violénsia ne’e la’ós dalan atu reklama, no estadu sei la tolera ba aktu violensia ne’ebé iha intensaun hakarak trava programa governu ninian. Tanba ne’e, karik mosu failansu ruma, ne’e governu ninia responsabilidade no ida ne’e MKAE nia servisu, la’ós maluk sira uza fali violénsia mak buka solusaun.
Dehan nia, ba maluk ne’ebé uza violénsia tenki prontu responsabiliza ba aktu ne’ebé halo iha lei nia oin.
“ha’u hanoin situsaun ne’ebé ezije atu hadi’a, ami sei hadi’a, ne’e la duvida. Maibé sira ne’ebé uza violénsia atu trava programa ida ne’e sira tenke hatan tuir lei,” katak Joaquim
Jornalista : Egidio da C. T. Nono
Editor : Ezequias Tomás
