Lafaek News— Akontesimentu iha postu Lacluta, munisípiu Vikeke, ne’ebé mak benefisiáriu balun sunu Cesta Bázika, Xefe bankada Partidu Congresu Nasionál Rekonstrusaun Timor (CNRT), Duarte Nunes, afirma hodi konsidera hanesan aktu espresaun ne’ebé mak hatudu hosi benefisiáriu bainhira la satisfas ho situasaun ruma.
“Ida ne’e hanesan, aktu ida ne’ebé ke dala ruma, bele espresaun ba situasaun ne’ebé ke populasaun la simu. Ne’e ita bele halo analiza hanesan ne’e,” Duarte relata iha resintu PN, tersa (01/12).
Deputada ne’e reforsa, dalaruma populasaun la simu kona-ba montante osan $ 25 dolar ne’ebé governu promete ladún iha transparénsia, maka halo populasaun la satisfeitu hodi sunu sasán hirak ne’e.
Entretantu situasaun ne’e akontese hafoin hosi parte Ministériu Koordenadór Asuntu Ekonómiku (MKAE), iha loron domingu (29/11), lansa programa cesta bázika no bainhira ministru hamutuk ho autoridade munisípiu no lokál atu hahú distribuisaun, benefisiáriu ida derepente hakat tama ba fatin distribuisaun sunu sasán hirak ne’e.
Jornalista : Egidio da C. T. Nono
Editor : Ezequias Tomás
