Lafaek News— Durante fulan ida resin nia laran Unidade Polísia Fronteira (UPF), kompaña A Tunu-Bibi Maliana menus ai han, nune’e obriga sira tenki ba “deve” foos iha loza sira ne’ebé besik hodi konsumu.
“Alimentasaun ba fulan ida ne’e ami susar tebes, atu ba fulan rua ona alimentasaun (Foos) la mai. Tuir informasaun ne’ebé ami rona hosi komandu munisípiu katak (Foos) iha tiha ona maibé ate a data ami nian ne’e seidauk mai,” Komandante Kompaña A Inspetór Paulo Assis Belo, ba LafaekNews iha postu Tunu Bibi-Maliana, segunda (30/11).
Nune’e Hatutan nia hodi rekoñese, ho situasaun refere dala ruma tenki ba foti foos iha loza sira ne’ebé besik hodi aguenta netik para hein komandu distribui ai han mai.
“Foos dala ruma ami ba deve iha keos sira. Tanba dala ruma alimentasaun ne’e tarde entaun ami tenki deve duni,” dehan nia.
Entretantu bainhira jornalista Lafaek News konfirma liga-ba asuntu ne’e, komandante Unidade Polísia Fronteira (UPF), Superintendente Polísia João Sancho Pires, iha komandu jerál PNTL Kaikoli, tersa (01/12), hatete mezmu sempre tarde maibé komandu sempre esforsu hodi responde lalais kestaun ne’e.
“Osan alimentasaun mak tama tarde, komandu mós dezaraska hela hodi koordena ho ministeriu balun, atu bele apoia alimentasaun fahe ba kompaña tolu ne’e. Alende ne’e ami mós koordena ho CRN (Empreza) bele apoia hela ami hodi halo distribuisaun foos ba kompaña (Postu) tolu Maliana, Suai no Oekusi,” nia informa
Ikus komandante UPF Superintendente Polísia João Sancho Pires, afirma mezmu hasoru hela dezafiu ba menus ai han maibé hanesan autoridade seguransa sempre prontu nafatin servisu hodi proteje ita rain hosi infiltrasaun ilegál sira.
Jornalista : Anselmo Miranda
Editor : Ezequias Tomás
