Lafaek News— Sentru Nasionál Chega (CNC), realiza serimonia lansamentu livru biográfia istória moris, Francisco Xavier Amaral, ne’ebé hakerek husi Professor mestre Aniceto Guro Berteni Neves.
Diretór Ezekutivu Sentru Nasionál Chega (CNC), Hugo Maria Fernandes, hatete iha tinan ida liu ba CNC halo diskusaun ho Prof. Mestre Aniceto Guro Berteni Neves atu oinsá bele elabora obra memoria ida kona-ba Saudozu Francisco Xavier Amaral no iha 2019 Sentru Nasionál Chega apoiu Prof. Mestre Aniceto hodi halo peskiza iha Timor, Macau no hakat mós ba Lisboa hodi konpila livru ne’ebé ohin lansa.
“Ohin loron importante ida mós tanba iha tinan 45 liu ba ita nia prezidente Francisco Xavier Amaral halo nia kna’ar nudar prezidente hodi fo pose ba membru primeiru guvernu RDTL nian, hanesan loron ida ohin iha 30 novembru 1975, nune’e peskiza iha Macau mós bele hetan fila fali Francisco Xavier Amaral nia propinas no informa ba koléjiu São José Macau katak alumi São José mak sai prezidente Primeiru Timor ninian” dehan Diretór CNC Hugo M. Fernandes iha salaun konferénsia CNC Balide, 30/11/2020.
Hugo afirma, nu’udar diretór ezekutivu CNC nu’udar mós editór ba livru ida ne’e durante fulan 8, no testu sira ne’ebé prof. Mestre Aniceto halo ba dala hitu maibé nia halo revizaun no haruka lori fila-fali.
“Prof.Mestre Aniceto dalaruma haree ha’u nervozu oituan tanba testu mai to’o dala hitu ha’u revizaun no haruka fila hodi halo revizaun atu hatuur obra ida ne’e semiakadémika no semibiográfia,” informa Nia.
Entretantu eskritór Prof.Mestre Aniceto Guro Berteni Neves relata, hato’o agradese ba CNC tanba kuaze tinan rua halo interasaun hodi produz istória no memoria vida moris avó Francisco Xavier Amaral nian, no maluk ne’ebé nia hasoru hodi halo intrevista atu kompleta istória moris avó Xavier hahú husi 1974 to’o avó Xavier hakotu iis.
“Antes ha’u atu haú peskiza ha’u halo uluk perguntas, sé mak Francisco Xavier Amaral iha istória luta povu Timor no tanba sá mak Francisco Xavier Amaral, nune’e lider sira nia tarjetu ba vida ne’e importante laos de’it para ita koñese no laos de’it atu rekolla sira nia memoria ba narrativu istória nasionál, maibé importante liu-liu sai materia ba formasaun lideransa ba jerasaun foun no-mós ba formasaun unidade istória no rekonsiliasaun Timor-Leste,” relata Nia.
Enkuantu Nia halo rezumu ba memoria barak ne’ebé nia deskobre no rekolla husi lider istóriku ne’ebé nia hasoru mak hanesan, Xavier Amaral nu’udar simbolu unidade povu Timor Leste iha inspirasaun koletiva ba independensia nasionál Timor Leste.
Xavier Amaral nu’udar nasionál Kuriozu ida ne’ebé fiar iha demokrásia, Xavier Amaral nu’udar ema di’ak no brani ida, Xavier Amaral nu’udar lider ida mak hatudu dalan ba kauza liberdade husi okupasaun Indonezia nian, no Xavier Amaral nu’udar oradór famozu.
Jornalista : Juvita dos Santos
Editora : Nelya Barros
