Lafaek News—Konstitusionalista Timor-oan Manuel Tilman, konsidera oitavu governu konstitusionál lideradu Jenerál Taur Matan Ruak viola regra aprezentasaun orsamentu.
Nia dehan, governu viola regra orsamental kona-ba aprezentasaun orsamentu ordináriu, Tanba tuir nia, loo-loos OJE 2021 ne’e aprezenta iha 15 Outubru, más bainhira la to’o ka liu hosi data ne’e xefe ezekutivu tenke aprezenta razaun ka justifikasaun ba uma fukun PN.
“Komu deputadu maioria iha parlamentu nasionál ohin loron ne’e apoiu hela governu, sira kala iha razaun tanba saida,” informa Manuel Tilman ba Lafaek News, iha ninia rezidénsia beach garden Nu’ú Tasi (Pantai Kelapa), segunda, (30/11/2020).
Entretantu sorin seluk nafatin nia rekoñese, tuir prosedimentu diskusaun orsamentu governu halo duni violasaun.
“Ba ida ne’e, ha’u nia hanoin mak ida ne’e. Katak normalmente lei finansa publika haruka governu aprezenta iha 15 outubru orsamentu jerál do ano seguinte, sé foin aprezenta tarde, iha de’it 30 dias atu diskute promulga, bele ita nia deputadu sira halo esforsu makas halo duni milagre, molok 30 dezembru aprova orsamentu jerál estadu i promulga duni labele akontese fali hanesan OJE uluk (2020) nian la aprova tiha mós prezidente repúblika nein disolve PN,” nia hakotu.
Jornalista : Ezequias Tomas
Editora : Nelya Barros
