Lafaek News—Cruz Vermelha Timor Leste (CVTL), ensera treinamentu ne’ebé hala’o durante loron 3 ba jornalistas kona-ba primeiru Sokorrus hodi hasa’e koñesimentu asegura an no ajuda ema seluk.
Sekretáriu Jeral Cruz Vermelha Timor Leste (CVTL), Luis Pedro Pinto hateten liu husi treinamentu primeiru Sokorrus ida ne’e fo agradese ba média sira iha Timor Leste liu-liu ba jornalista sira ne’ebé tuir treinamentu hodi jornalista utiliza ba materia sira ne’ebé hetan husi CVTL, hodi asegura an bainhira hala’o kobertura iha terrenu ba situasaun emerjensia ho nune’e iha ona koñesimentu hodi halo implementasaun.
“Hakarak agradese mós ba kolega jornalista sira ne’ebé maka tuir formasaun primeiru sokorrus durante loron tolu ne’e, ami nia esperansa boot katak oinsá jornalista sira utiliza matenek sira ne’ebé maka hetan husi CVTL atu ba sira nia servisu lor-loron ba sira nia atividade sira halo tanba sira mós infrenta risku boot bainhira sira ba halo kobertura ba atividades ruma iha terrenu liu-liu iha situasaun emerjensia ruma entaun koñesimentu sira ne’e sai hanesan bukae ida para sira bele kontinua atu halo implementasaun,” Luis Pedro Pinto ba jornalista sira iha edefisiu CVTL nasional, kinta 21/03/2024
Sekretáriu Jeral Cruz Vermelha Timor Leste ne’e rekomenda ba jornalista sira hodi fahe informasaun ba média sira ba oin mós media seluk bele hetan oportunidade ida ne’ebé CVTL halo no kontinua hala’o hodi fo treinamentu ba jornalista sira seluk ne’ebé seidauk hetan,
“Iha rekomendasaun mós husu ba kolega jornalista sira para oinsá maka ba futuru kontinua atu halo informasaun ne’e ba kolega média sira seluk sim ha’u hanoin ne’e mós importante teb-tebes CVTL sei buka rekursus tomak para atu bele oinsá maka bele fo formasaun ba kolega jornalista ne’ebé maka la iha oportunidade ba loron tolu ne’e” dehan Sekjen CVTL
Sorin seluk treinadora, Joanina Jacob Mau, afirma katak, treinamentu durante loron tolu jornalista intersante tebes no tuir prátika ne’ebé husi primeiru Sokorrus nian no teknika ne’ebé liu husi simulasaun hatudu duni ba materia ne’ebé fó hodi taka kanek, ran sulin makas no liman ain tohar ba vitima ne’ebé presiza hodi tulun liu husi ain tohar liman kanek ain kanek ran sulin makas presiza ajuda maluk sira.
“Tuir ha’u nia hanoin durante jornalista hotu-hotu interesante teb-tebes i sira tuir duni teknika ba prátika sira ne’ebé ami fo ba sira hatudu duni liu husi simulasaun nian oinsá taka kanek tohar parte hirak ne’e no mós liu husi parte hirak ne’e ami hare sira bele duni atu halo primeiru Sokorrus basiku ba vitima sira ne’ebé presiza”
Iha fatin ne’e partisipantes ba reprentante jornalista, Hortencio Sanches argumenta, formasaun ne’ebé fasilita husi CVTL ba jornalista hamutuk nain 19 ba matéria ne’ebé di’ak hodi hasa’e koñesimentu ba jornalista nia kapasidade bainhira halao kobertura iha terrenu no hanesan bukae ida ba jornalista sira hodi asegura an no oinsá atu ajuda maluk sira ne’ebé hetan asidente hanesan mós sokorista hodi ajuda maluk sira ne’ebé presiza nia tulun.
“Ami jornalista hamutuk sanulu resin sia ne’ebé tuir formasaun fasilita husi CVTL rasik ha’u hanoin formasaun ne’e di’ak tebes ba ami no matéria ne’ebé durante loron tolu ami hetan sai hanesan bukae ida ba ami atu nune’e ami bele implementa iha ami nia servisu fatin hanesan jornalista ba kobertura bainhira hasoru asidente ruma hasoru dezastre ruma ami bele bainhira ema ruma hasoru ami hanesan primeiru Sokorrus atu fo ajuda ba iha familia vitima sira ne’ebé presiza” heteten
Jornalista : Aniceto Dias
Editór : Agapito de Deus
