Lafaek News- Komandu Polísia Nasionál Timor Lorosa’e liuliu komandu munisípiu Dili alerta ba komunidade liuliu inan no aman sira atu labele hatoman aan autoriza oan sei idade ki’ik kondús transporte, bainhira polísia hetan maka sei prosesa tuir lei ne’ebé iha.
Komandante Polísia Nasional Timor Lorosa’e (PNTL), munisípiu Dili Superintendente Xefe Henrique da Costa, afirma parte PNTL kontinua halo operasaun, kuandu hetan labarik tinan 17 mai kraik kondús karreta no motor maka polisia sei foti asaun hodi prende tuir lei ne’ebé iha no sei bolu inan aman atu responsabiliza.
“Ita nia atividade pasa revista kontinua la’o nafatin, sé hetan minoridade kondús transporte sei prosesa,” dehan Superintendente Xefe Henrique ba jornalista iha KMD kaikoli Dili, tersa 12/01/2021.
Reforsa nia, tanba ne’e nafatin husu ba inan aman atu labele hatoman no tenke tau atensaun makas ba oan sira liuhosi asaun la autoriza hodi kondús karreta no motor, tanba servisu ne’e labele de’it hein parte polisia, hotu-hotu tenke koopera atu nune’e hamutuk próteze Dili moos hosi asidente tráfiku liuliu hosi labarik idade ki’ik sira.
“Inan aman tenke fó hanoin ba oan sira, katak idade seidauk to’o 17 labele kondús transporte, sé inan aman husik de’it entaun oan sira patarata depois la kumpre regra no bele mós fó impaktu ba sira nia vida,” nia afirma
Entretantu liuhosi check point ne’ebé mak hala’o iha loron segunda (11/01), Polísia Nasionál Timor Lorosa’e (PNTL) konsege prende motorizada hamutuk 61 tanba dokumentu la kompletu.
Jornalista : Orlando Magno
Editór : Ezequias Tomás
