Lafaek News—Komandu Munisípiu Dili (KMD) kaptura tan suspeitu nain rua ho inisial TDA ho ADC ne’ebé komete kazu krime frutu na’ok komunidade nia motorizada iha area Don Aleixo.
“Suspeitu TDA ho ADC agora detein hela iha sela komandu Dili durante oras 72 depois mak aprezenta ba tribunal hodi kumpri sira nia responsabilidade ba krime frutu,” Dehan Euclides ba jornalista iha KMD kaikoli Dili, Kinta 21/01/2021.
Segundu komandante munisípiu Dili Superintendente, Euclides Belo informa, durante ne’e komunidade sira preokupa tebes ho sira nia transporte motorizadas ne’ebé lakon barak, tanba ne’e PNTL munisípiu Dili servisu ho entidades sira hodi ezekuta mandatu husi mandadu detensaun tribunal nian.
Komandu Dili halo kapturasaun ida ne’e kontinuasaun ba kazu frutu ne’ebé akontese iha semana rua liu ba ne’ebé PNTL Dili kaptura suspeitu nain tolu agora sira kumpri hela sira nia responsabilidade ba aktu krime agora suspeiru nain 3 uluk ba ona prizaun preventiva.
Nia afirma, Semana ida ne’e PNTL Dili hetan tan mandadu ho númeru rejistu kriminal 0642/20 , kumpre hodi kaptura tan sidadaun nain rua ne’ebé komete krime frutu.
Motor tolu ho modelu Honda, revo absuluta ho sapa matrikula D.2297, Honda revo fit sapa matrikula M.1738 no mos Honda, Meo Sreet sapa matrikula O.2769 agora motor tolu ne’e mak iha ne’e.
Nia dehan, Ninia kontinuasaun mak polisia halo aprensaun hodi sai evidensia ba krime frutu maibé motorizada sira seluk hamutuk 19 Komandu Dili haruka ona ba ministeriu publiku agora motorizada tolu mak iha ne’e (KMD).
Segundu Komandante Sujere, iha semana kotuk sira fo sai ona informasaun katak maluk sira ne’ebé ninia motor lakon bele halo komfirmasaun iha komandu Dili maibé bainhira KMD lori ona ba ministeriu publiku entaun komunidade sira bele komfirma fali iha ministeriu publiku.
“Bainhira ba halo komfirmasaun tenke lori ho dokumentu motorizada nian karik la iha dokumentus bele lori sasin sira husi Deler ne’ebé ita boot sira sosa motor,”Nia esplika.
Tuir dadus ne’ebé media online Lafaek News asesu, Durante ne’e PNTL munisípiu Dili kaptura ona suspeitu ne’ebé komete krime frutu hamutuk nain 5 maibé laos sira ne’e deit tanba sei iha suspeitu balu mak subar hela tanba ne’e PNTL munisípiu Dili nafatin esforsu aan kontinua buka tuir ema ne’ebé komete kazu frutu.
Jornalista : Orlando Magno
Editora : Nelya Barros
