Lafaek News— Governu liu hosi ministeriu edukasaun joventude no desportu (MEJD) hasai ona kalendariu eskolar katak prosesu aprendisajen hahu iha 18 janeiru tenke kumpri medidas prevensaun, maibé estudante Eskola Pres-sekundaria Geral 10 de Dezembro maioria la uza maskra inklui sabaun fase liman.
Diretur Eskola Pre-sekundaria Geral 10 de Dezembro, Calistro Guterres, informa, prosesu aprendisajen hahu la’o hanesan normal, maibé preokupa tebes ho estudante sira lauza maskra no mós sabaun fase liman mós laiha.
“Ami preokupa ho estudante iha eskola 10 de dezembro, ne’ebé la uza mascara, ami sempre fó hatene ba estudante hotu-hotu katak tenki kumpri regras estadu emerjensia nian, maibé estudante barak maka lakumpri, balun kumpri regras, balun ne’ebé mascara laiha atu usa tanba osan laiha atu sosa maskra,” dehan Diretur Eskola Sekundaria Geral 10 de Dezembro, Calistro Guterres, ba lafaek news iha nia knaar fatin, kinta, 21/01/2021.
Diretur akresenta, durante iha seman hirak nia laran ne’e kontinua kontrola estudante sira hodi kumpri protoklu ministeriu saude no saude mundial nian bainhira lakumpri maka sei fó sansaun.
“Ami sempre hare’e ba regras sira, no koko estudante sira nia temperatura maka sira foin tama aula laran karik sira la kumpri regras ne’ebé maka ami fó ba sira, ami sei fó sansaun ba estudante sira, no deside katak eskola maka sosa maskara ba sira ou inan aman maka sosa ba oan sira,” tenik Diretur.
Nia informa, fasilidade ne’ebé iha apoiu husi ministeriu saude no koika iha tinan kotuk hanesan maskra, sabaun no balde, maibé to’o agora sabaun no maskra hotu, tan ne’e husu ba MEJD no MS atu apoiu fasilidade prevensaun nian.
“Ami nafatin husu ba ministeiriu saude atu bele fó apoiu ba estudante eskola 10 de dezembro, tanba estudante barak mak la kumpri regras, se maskra maka iha ami fahe ba sira, la kumpri regras entaun ami sei bolu inan-aman, tanba sa maka estudante ne’e la uza maskra,” hateten nia.
Enkuantu, estudante ne’ebé halao nia prosesu aprende iha eskola pre-sekundaria 10 de dezembro Comoro kompostu husi primeiru anu to’o treseiru anu hamutuk rihun ida haat-nulu.
Antes ne’e mós ministeriu eduksaun joventude no desportu (MEJD) Armindo Maia, hatete, maskra ladun barak maibé iha stok ne’e hamutuk rihun neen-nenulu, ne’ebé atu distribui, tanba eskola mós tuir kalendariu eskolar atu hahu iha dia 18 fulan janeiru.
“Ita hanoin katak tempu sei iha atu distribui, maskra la’os buat foun tanba uluk estadu emerjensia liu ba mós ema distribui ona, ne’ebé labele hein de’it buat hotu husi estadu, maskra ne’e dolar ida, liu-liu hena ne’ebé sei bele fase hodi usa durante iha estadu emerjensia, tanba tuir kalendariu eskola ne’e hahu iha dia 18 ba eskola hotu-hotu, maibé ita mós presija hare’e ba iha preparasaun eskola nian,” nia informa.
MEJD fundamenta, reuniaun ona ho parseiru sira atu hanoin saida maka iha ona no saida maka presija hanoin, tanba hare’e ba orsamnetu mós foin dadauk aprova sedauk ezekuta, maibé material balun ne’ebé maka iha bele distribui dadauk ona hanesan maskra, hand-sanitaizer, desinfetante no fornesementu bee ba eskola sira.
Jornalista : Sabina sancha & Joselina do Santos
Asisten Editor : Pedro de Almeida
