Lafaek News—Komandante Unidade Patrullamentu Fronteira (UPF), Superintendente Euclides Belo informa, horikalan membru PNTL kaptura tan sidadaun Timor oan nain 4 iha area fronteira, ne’ebe fila husi Atambua-Indonezia liu husi dalan ilegal.
“Horikalan ita halo operasaun koordenada ne’ebe maka halo husi PNTL Munisipiu Bobonaro, UPF, servisu Sekreta sira iha area Bobonaro, liu-liu iha Maliana, aguarda tan sidadaun nain 4, ne’ebe deskunfia sira fila hosi Indonezia”, esplika komandante UPF, Euclides Belo, iha Sentru Formasaun Polisia, Comoro Dili, kuarta 25/08/2021
Euclides dehan, agora da-daun sidadaun Timor-oan nain 4 ne’e iha hela prosesu identifikasaun no sei entrega ba parte saude Bobonaro nian hodi evita propagasaun moras Covid-19.
“Alende nain hat ne’e, horikalan iha postu Alto Lebos mos simu sidadaun ida hosi Maliana ne’ebe entrega an ba ita nia membru PNTL no F-FDTL daudaun submete ona ba kuarantena tanba deskufia nia mos fila hosi Indonezia”, subliña.
Euclides Belo, mos husu nafatin ba komunidade sira iha liña fronteira atu informa ba parte seguransa karik deskunfia timor oan balu ne’ebe fila husi nasaun viziñu Indonezia hodi kumpri protokolu saude nian.
“Ami nafatin informa ba komunidade liu-liu sidadaun sira iha liña fronteira katak, timor oan ne’ebe maka hakat ba nasaun viziñu fila mai labele subar. Obrigatoriumente bele informa ba parte seguransa hodi kumpri protokolu saude nian, tanba moras variante Delta ne’e perigu tebes,” nia esplika.
Komandante UPF Euclides Belo deklara, sidadaun ne’ebe komete iregularidade hodi kontra lei tenke kumpri uluk protokolu saude nian depois hatan ba prosesu tuir mai.
Jornalista : Orlando Magno
Editor : Agapito de Deus
