Lafaek News—Ministru Prezidénsia no Konsellu Ministru (MPKM) Fidelis Manuel Leite Magalhães, informa, governu liu husi reuniaun konsellu ministru aprova ona projetu rezolusaun governu nian ne’ebé impoin serka sanitária iha munisípiu Baucau no Covalima to’o loron 8 fulan setembru tinan ne’e.
“Aprova rezolusaun Governu nian ne’ebé impoin Serka Sanitária (SS) iha munisípiu Baucau no Covalima hahú husi oras 23:59 loron 26 fulan agustu to’o oras 23:59 loron 8 fulan setembru tinan 2021,” dehan Fidelis ba Jornalista hafoin remata enkontru KM iha Palasio Governu Dili, kuarta (25/08/21).
Governante esplika, nune’e bandu sirkulasaun ema sira nian entre área no Munisípiu sira ne’ebé refere ona no sirkunskrisaun administrativa sira seluk, eseptu iha kazu hirak ne’ebé nia fundamentu forte tanba razaun sira seguransa públika, saúde públika, asisténsia umanitária, manutensaun ba sistema abastesimentu públika ka razaun seluk ne’ebé presiza atu hala’o ba interese públiku nian.
Nia hatutan, neduni la inklui iha proibisaun sirkulasaun ida ne’e individu sira ne’ebé komprova vasinasaun kompleta (doze daruak) kontra covid-19, no mós ba labarik sira ho idade tinan 6 mai kraik ne’ebé akompaña.
Entretantu mantein impozisaun serka sanitária iha munisípiu Dili no Ermera too oras 23:59 loron 13 fulan setembru no mantein impozisaun serka sanitária iha área sira husi suku Naimeco iha postu administrativu Pante Macassar no suku Oesilo, iha Rejiaun Espesiál Oe-Cusse Ambeno (RAEOA) to’o oras 23:59 loron 8 fulan setembru 2021.
Jornalista : Juvita dos Santos
Asisten Editór : Pedro de Almeida
