Lafaek News-Governu liu husi Konsellu Ministru (KM), deside ona impoin tan Konfinamentu Obrigatóriu aba loron hitu (7) iha munisípiu Dili, maibé fo biban nafatin ba negosiante sira atu faan sasan husi dader saan to’o lokraik.
Ministru Prezidénsia no Konsellu Ministru (MPKM), Fidelis Manuel Leite Magalhães ,hateten, impoin Konfinamentu domilisiáriu jerál ba ema hotu ne’ebé dadaun ne’e hela iha munisípiu Dili, ne’e duni tenke hela iha sira nia uma ka sira nia alojamentu temporáriu ne’ebé inkluí sentru akollimentu, eseptu, iha situasaun ne’ebé preve iha ne’e, liu liu tanba razaun saúde, serbisu, asesu ba sasan no servisu nesesidade bázika nian no simu vasinasaun kontra Covid-19.
“Konfinamentu domilisiáriu jerál iha munisípiu Dili entre oras 00:00 loron 27 fulan agustu to’o oras 23:59 loron 2 fulan setembru tinan 2021” dehan Fidelis ba Jornalista hafoin remata enkontru Konsellu Ministru iha Palasíu Governu Dili, kuarta (25/08/21).
Governante ne’e akresenta, iha área hotu-hotu iha munisípiu Dili nian, bandu transporte públiku liu-liu taxi, mikrolet, biskota, no anguna halo sirkulasaun. Nune’e bandu atu halo selebrasaun relijioza koletiva no bandu mós atu hala’o serimónia funebre ne’ebé envolve partisipasaun ema na’in sanulu liu no estabelesimentu komersiál, industrial, artezanal ka prestasaun servisu nian taka ba públiku, ho exesaun ba estabelesimentu sira ne’ebé autoriza iha Rezolusaun Governu ne’e, liuliu estabelesimentu ne’ebé fa’an ai-han no sasan nesesidade bázika nian, eletrisidade, telekomunikasaun, prestasaun kuidadu mediku, farmásia, postu kombustivel nian, no instituisaun finanseira sira.
“Restaurante sira bele fornese hahan iha rejime take away ka entrega iha uma de’it no estabelesimentu sira-seluk ne’ebé taka ba públiku bele dezenvolve ninia atividade liuhusi servisu entrega ba uma de’it” informa Nia.
Enkuantu vendedor ambulante ba sasan alimentár no sasan ba nesesidade bazika bele mantein sira-nia atividade. Merkadu sira munisípiu nian, Manleuana no Taibessi, mantein ninia funsionamentu, husi tuku 6 dader to’o tuku 6 loro-kraik. Tenik Fidelis.
Jornalista : Juvita dos Santos
Asisten Editór: Egidio Nono
