Lafaek News—Domingu horseik 24/01/2021 Polísia Nasionál Timor-Leste (PNTL), kaptura hikas autor na’ok motor ho inisial EMF iha suku Lispaat, munisipiu Ermera ne’ebé halai sai huai sela eskuadra Don Aleixo Iha loron 08/09/2020.
Komandante PNTL Munisípiu Dili, Superintendente Xefe Henrique da Costa informa, iha momentu loron 7 Setembru 2020, oras tuku 03:30, madrugada autór na’ok motor EMF hamutuk ho nia maluk nain 3 na’ok motorizada iha area fomentu 3 munisípiu Dili.
“Autor EMF halai sai husi eskuadra Don Aleixo depois arguidu ne’e organiza nia kolega nain 3 ho inisial JMMA, GDC, GJX na’ok sidadaun Timor-oan balun nia motorizada atu faan, maibé da-daun ne’e PNTL detein hela autor EMF iha Sela komandu Dili no nain tolu ita nafatin sei buka tuir,” Dehan Komandante Munisípiu Dili Henrique ba jornalista iha KMD Dili, segunda 25/01/2021.
Superintendente Xefe Henrique esplika, Komandu PNTL munisípiu Dili halo koperasaun ho komandu PNTL munisípiu, Eskuadra polísia no komunidade sira hodi buka tuir arguidu EMF ho nia kolega sira durante fulan 4 nia laran.
Nia afirma, liu husi kordenasaun diak entre komandu munisípiu dili ho komandu munisípiu Baukau ho ninia estrutura sira Durante fulan 4 nia laran buka arguidu sira ikus mai konsege kaptura autor EMF.
“Iha loron 24/01/2021 oras tuku 4 lorokraik komandu PNTL munisípiu Baukau halo kapturasaun ba autor EMF hamutuk ho motorizada ne’ebé na’ok iha munisípiu Likisa,” dehan Nia.
Nia argumenta, autór EMF ho alzema rua ida iha nia liman no ida iha nia ain, da-daun ne’e datein hela ona sela komandu munisípiu Dili tuir mandadu detensaun númeru prosesu NUC.0642/2020 hodi hein primeiru interogatóriu husi tribunal.
Henrique dehan, Autor EMF ho nia maluk sira na’ok mós objetu krime balun, tan ne’e komandu munisípiu Dili la tolera ba ema ne’ebé komete kazu frutu agravadu hanesan na’ok ema nia sasan.
Tuir dadus Komandu Dili ne’ebé Jornalista Lafaek news asesu katak, polísia sira prende ona motorizada ne’ebé autor na’ok hamutuk objetu motorizada 24, motorizada 19 Komandu PNTL munisípiu Dili entrega ona ba ministériu públiku no motorizada 5, sei iha Komandu Dili, nune’e nafatin buka tuir motorizada seluk ne’ebé arguidu sira na’ok.
Jornalista : Orlando Magno
Editora : Nelya Barros
