Lafaek News—Segundu komandante PNTL, munisipiu Dili, Superentenden Euclides Belo, afirma autor ne’ebe produz kupon SDSB falsa komete krime rua , falsifikasaun dokumentu bazeia ba kodigu penal artigu 304, inklui esplorasaun jogu disitiu iha artigu 322.
Euclides Belo justifika suspeitu EMCF kapturadu iha loron 14 Fevereiru tuku 11:00, Beto Timur suku Madohi, postu administrativu Don Aleixo, munisipiu Dili, ho razaun komete krime falsifikasaun dokumentu ne’ebé kontempla iha artigu 304 kódigu penal, inklui esplorasaun jogu disitiu ne’ebé kontenpora mos iha kódigu penal artigu 322.
“Suspeitu konstitui hanesan detidu kumpri hela oras 72 iha sela komandu munisipiu Dili depois mak aprezenta ba tribunal hodi supmete ba primeiru interogatoriu,” dehan Superintendente Polisia Euclides ba jornalista iha KMD kaikoli Dili, tersa 16/02/2021.
Segundu Komandante PNTL munisípiu Dili ne’e haktuir, objetu ne’ebé PNTL halo aprensaun hodi sai evidénsia ba tipu krime rua ne’ebé bandu iha kódigu penal.
Nia afirma, evidénsia ne’ebé PNTL munisípiu Dili prende hanesan, Kupon singapure black 1.217, roda block 42, amizade block 3, kupon kiss orijinal ulun 2, laptop model Lenovo kor metan 1, printer marka kenon kor metan 3 no ho kabel kompletu.
Iha mós mákina ko’a surat tahan ki’ik 2 no boot ida kupon karbon korderoza 73, karbon mos 178, karbon kor kinur ne’ebé sai ona total 2226, karbon kor azul ne’ebé prontu tiha ona hamutuk 351, tinta kinur 7, tinta kor mean masa 2, azul masa 4, kor metan masa 2, inklui mos gomawedra masa ida karega 5.
“Evidensia sira nee mak PNTL munisipiu dili liu husi eskuadra Dom Aleixo rekolla iha nia rezidensia suku Madohi Don Alexu munisipiu Dili,” Euclides deklara.
Entretantu, kupon SDSB ne’ebé suspeitu produz deskonfia dezde iha tinan 2019 to’o ohin loron, maibé da-daun PNTL kaptura ona suspeitu no tenke responsavel ba nia aktu iha tribunal.
Jornalista : Orlando Magno
Editora : Nelya Barros
