Lafaek News—Komandu Munisípiu Dili liuhosi operasaun iha semana hirak liubá konsege kaptura suspeitu na’in 3 ne’ebé na’ok motor no da-daun ne’e lori ona ba kumpre prizaun preventiva.
“Operasaun ne’ebé ita hala’o iha semana kotuk, kaptura ona suspeitu na’in tolu ho inisial JDX, JDJP no JDA ne’ebé na’ok motor. Agora liuhosi desizaun (tribunál) iha semana kotuk kumpre prizaun preventiva,” Superintendente Xefe Henrique da Costa, informa ba jornalista sira iha Kaikoli-Dili, segunda (14/12).
Nia afirma, evidénsia ne’ebé hosi parte polísia konsege rekolla maka motorizada hamutuk 10. Maibé parte polísia deskonfia sei iha tan sasán seluk la’ós mak ne’e de’it ona.
Tanba ne’e, parte polísia kontinua esforsu nafatin hodi buka tuir sasán seluk i bele mós kaptura tan suspeitu seluk ne’ebé involve iha kazu hanesan.
Afirma nia, prosesu investigasaun kontinua la’o hela, i ba sasán ka motor hirak ne’e polísia seidauk bele intrega direita ba na’in sira, tanba la’ós kompetensia polísia nian maibé ne’e kompetensia ministériu públiku nian.
Jornalista: Orlando Magno
Editór : Ezequias Tomás
