Lafaek News- Negosiante Nesesidade Báziku Laurinda da Silva, hosi Aldeia Lakuma, Suku Bahamori, Munisípiu Baukau, sente triste tanba durante estadu emerjénsia Tomate ne’ebé lori hosi Venilale mai fa’an la folin tanba menus kompradór, maski nune’e kontinua fa’an hodi responde nesesidade uma laran.
Negosiante ne’e dehan, antes governu seidauk implementa estadu emerjénsia sasán ne’ebé nia lori mai fa’an sempre folin, maibé tanba surtu Covid-19 ne’ebé invade mundu, governu Timor Lorosa’e foti desizaun hodi deklara estadu emerjénsia, komesa ninia rendimentu mós tu’un nune’e fó implikasaun makas ba nesesidade uma laran.
“Estadu emerjénsia halo ami nia rendimentu tu’un, la hetan osan ne’ebé mak di’ak. Tanba ema tama mai merkadu mós ladún barak nune’e halo loron ida hetan de’it dollar 10, kompara seidauk EE bele hetan liu ida ne’e,” Laurinda ba LafaekNews foin lalais ne’e iha merkadu Taibesi.
Informa nia, sasán lori hosi munisípiu Baukau mai, kada balde ida dollar sanulu resin maibé tanba ema sosa menus dala barak sasán sai aat hotu.
“Tomate ho derok ami sosa iha Baucau Venilale, balde ida folin dolar Sanulu Resin Lima. Fa’an fali iha merkadu ho folin dolar Rua Nulu, maibé kompradór menus, Tomate liu semana ida sai dodook no lori ba so’e hotu,” dehan nia
Ikus ho oin triste nia salienta, ba mai Baukau sosa sasán kada loron segunda-feira no tersa fila kedas hodi mai fa’an maibé mai ema sosa menus sente triste más tanba nesesidade uma laran, hakarak ka lakohi tenki nafatin fa’an.
Entretantu sasán ne’ebé nia loro mai fa’an la’ós de’it Tomate maibé iha mós Lis Mean, Bua no Malus, Señora inklui Kulu tunu.
Jornalista : Rita Moniz
Editór : Ezequias Tomás
